من النهاردة أنا مش هترجاك تبصلي ولا تحبني.
اتكلم بعصبية
دعاء متعمليش دراما.
ابتسمت لأول مرة.
ابتسامة هادية أوي.
لا يا منصور الدراما دي كانت زمان، لما كنت بصدقك.
وشاورِت على العربية.
انبسط بيها أنت وإحسان.
وبعدين بصيت في عينه مباشرة.
بس افتكر حاجة واحدة العربية دي أول جنيه فيها كان من دهبي.
وشه اتغير.
لأن دي الحقيقة اللي عمره ما هيقدر ينكرها.
لفيت ودخلت البيت.
وسبتهم واقفين برا.
أول ما قفلت الباب، جسمي كله بدأ يترعش.
القوة اللي كنت واقفة بيها اختفت فجأة.
وقعدت على الأرض أعيط.
لكن المرة دي كان فيه فرق.
المرة دي مكنتش بعيط على راجل راح لواحدة تانية.
كنت بعيط على سنين ضاعت.
بعد ساعتين تقريباً
سمعت خبط على الباب.
افتكرت منصور.
لكن لما فتحت
اتفاجئت بأخويا.
واقف قدامي.
وشنطة سفره في إيده.
بصيتله بذهول.
إنت هنا؟!
قال وهو داخل
أول طيارة لقيتها ركبتها.
وانا لسه مش مصدقة.
قال بحزم
أختي تتكسر وأنا قاعد بره؟ مستحيل.
ولأول مرة من وقت طويل
حسيت إن ضهري مش مكشوف.
لكن اللي أخويا ماكانش يعرفه
إن منصور وإحسان كانوا في نفس اللحظة قاعدين في كافيه قريب.
وبيخططوا لحاجة أخطر بكتير من مجرد جواز.
حاجة لو تمت
كانت هتضيع تعبي وشقا عمري كله.
قعد أخويا قدامي وهو ساكت.
كان بيسمعني وأنا بحكي كل حاجة بالتفاصيل.
من أول الدهب.
لحد كلام منصور قدام البيت.
ولما خلصت، فضل دقيقة كاملة باصص للأرض.
وبعدين رفع عينه وقال
هو البيت ده باسم
مين؟
استغربت السؤال.
إيجار قديم باسم منصور.
هز راسه وقال
تمام.
قولت بقلق
تمام إيه؟
قال بحزم
أول حاجة هنعملها الصبح نروح لمحامي.
بصيتله بتوتر.
محامي ليه؟
رد من غير تردد
عشان تحفظي حقك.
سكت شوية وكمل
الرجالة لما تحس إن الست خاېفة بتتمادى. أما لما تعرف إن الست بدأت تاخد خطوات قانونية بتفوق.
تاني يوم الصبح أخدني وراح بيا لمكتب محامي معروف.
المحامي سمع القصة كلها.
ولما عرف إن جزء كبير من تمن العربية متدفع من دهبي قال
أي حاجة تثبت بيع الدهب أو تحويلات أخوكي أو شهود على الكلام ده هتفيد جداً.
أخويا قال فوراً
كل حاجة هنجمعها.
وبعدين بص للمحامي وقال
إحنا عايزين نمشي في إجراءات التمكين الأول.
المحامي هز راسه.
وابتدى يشرح الإجراءات.
أما أنا فكنت قاعدة ساكتة.
حاسة إني بتفرج على حياة واحدة تانية مش حياتي.
عشر سنين
جواز.
وأول مرة أقعد قدام محامي عشان أحمي نفسي من جوزي.
بعد ما خرجنا من المكتب أخويا وقف قدامي وقال
اسمعيني كويس يا دعاء.
بصيتله.
قال
من النهاردة مفيش دموع قدام منصور.
بس
قاطعني
ولا بس.
أنا موجوعة يا أحمد.
رد بحزن
عارف بس الۏجع ده لازم يتحول لقوة.
وفي نفس الوقت تقريباً
كان منصور قاعد مع إحسان في كافيه.
إحسان كانت مبسوطة وهي بتقلب في موبايلها.
لكن فجأة ملامحها اتغيرت.
منصور استغرب.
مالك؟
ورته شاشة التليفون.
وكانت واحدة من الجارات منزلة منشور طويل على فيسبوك.
من غير ما تذكر أسماء.
لكن كل أهل المنطقة فهموا المقصود.
والتعليقات كلها ضد منصور.
وشوية بشوية
بدأت سمعته تتأثر.
منصور قفل الموبايل بعصبية.
وقال
سيبك من كلام الناس.
لكن إحسان لأول مرة سألت سؤال مختلف.
سؤال خلاه يتوتر.
قالت
هو صحيح مراتك راحت لمحامي؟
رفع رأسه بسرعة.
عرفتي منين؟
ردت
ماما سمعت من الجيران.
وسكتت لحظة قبل ما تكمل
