حب كبير
قومت و أنا مش عارفه فكر يعمل كده إزاي
بعد ما الدكتور مشي و هو نزل يجيب العلاج اللي كتبه الدكتور لقيته جايب أكل جاهز تاني و مسنود بره على السفرة هو جاب أكل تاني غير اللي جابه في الأول
لسه بشوف الأكياس فيها ايه و لقيته دخل من الباب
ده أكل أنا جبته بدل اللي كلته تعالى يلا كلي الدكتور كاتب لك تحليل انيميا و بيقولي ضعيفة باكل أكلك أنا
مارضتش أضحك مع إني همىوت و أضحك
بصيت له و ماردتش
خلصي و كلي تحصلك حاجة يغمى عليك أبوك يجي يخرب الدنيا
ده المهم يعني في الموضوع
أهلي لو عرفوا إني تعبانة مش عشان بتحبني لقدر الله و بتخاف عليا
يا حورية بحبك و بخاف عليك
بس مش بطريقتك دي يعني ايه خناقة طويلة عريضة عشان ماقولتلكيش تعالي اتفضلي كلي معايا
هو أنت زميلتي في الشغل ماتقعدي تاكلي
على فكرة هي الفكرة مش عشان ماعزمتش عليا الموقف البسيط ده بيتكرر كتير و ب أشكال أكبر و كلها تدل إنك مابتهتمش بيا مابتاخدش بالك مني
أنت ليه مش مراعي إني متجوزة بعيد عن أهلي و ماعنديش إخوات يسألوا عليا
و أنا مش بهتم بيك مانا جبت لك الدكتور اهو
بعد ايه
بعد ما ليا يوم كامل ماسألتش فيا
كان عندي زحمة في الشغل مافضتش بجد
و لا حتى رسالة
على فكرة يا حورية أقولك حاجة أنا لو مش واخد بالي من حاجة و أنت عايزاها قوليلي و هتلاقيني عملتها
و الله
أقولك
ايه اهتم بيا يا إبراهيم
خد بالك مني يا إبراهيم و قبل ماتنزل لو أنت زوج حنين كان زمانك واخد أجازة و قاعد جنبي و لا على الأقل جاي بدري و لا حتى مكلمني في التليفون
أقولك أنا سيبت أهلى اللي ماليش غيرهم و جيت عيشت معاك في حته بعيدة عشان شغلك مع إن أبويا ماكنش راضي و عشان بحبك إزاي أكون بحبك كده و مش حاسة من ناحيتك ب إهتمام
ليه بتوصلني ل كده بجد
مانت مش هتصدقيني بس بجد أنا مش بركز للدرجة دي يعني أنا في الشغل دماغي كلها في الشغل حاطط ف إعتباري إني هرجع و أنت هتبقي كويسة و لو مش كويسة هاخدك أكشف لك و بس مجاش في دماغي كل ده
ده طول حياتك كده
يعني المفروض مين يفكرك إنك تهتم بمراتك
أنت
قوليلي ماتنساش تكلمني يا إبراهيم هتلاقيني بكلمك أكلني معاك يا إبراهيم هتلاقيني بأكلك ب إيدي فسحني يا إبراهيم هتلاقيني بفسحك
إزاي يعني اللي بتقوله ده هو أنا هعلمك تهتم بيا إزاي
ايوه علميني عادي و أنا هنفذ تزعلي مني لو لفتي نظري و لقتيني طنشت لكن شوفتي لما قولتيلي إنك تعبانة و عايزة تكشفي و مضايقة إني ماسألتش و إنك
جعانة و ماكلتيش أنا نزلت و جبت الدكتور و جبت لك أكل تاني تزعلي مني لو كنت سيبتك زعلانة و نزلت و طنشتك
مانت مطنشني بجد على فكرة
وحياتك لا اعملي بس زي ما بقولك و صدقيني مش هتحسي ب اللي بتقوليه ده
الناس كلها تقول الاهتمام مابيطلبش و أنت عايزني أعيش عمري معاك أطلبه
مابتطلبيهوش من حد غريب و بعدين تزعلي لو طلبتي و مالقتيش رد
طريقتك غريبة و مش عجباني و مش مقتنعة
جربيها شوية لو مانبسطيش بطليها
أبطلها و تهتم بيا من نفسك لوحدك
جربيها بس الأول لو مانبسطيش و حستيها أحسن بطليها براحتك
كلامه غريب أول مره اسمعه في حياتي في واحد يقول كده لمراته
