رحت لأبويا، خدت منه الصينية وحطيتها على جنبة، ومسكت إيد أمي ورفعتها قدام الكل
بصوا يا ناس.. بصوا على الإيد اللي شقيت وربت، الإيد اللي علمتني وبنت البيت ده.. يرضي ربنا الإيد دي تغسل غسيل البرانية في البيت اللي بنته بفلوس غربتي؟
بدأت الحقيقة تظهر زي الشمس. رفعت كم جلابية أبويا ووريتهم الزرقان اللي في دراعه من كتر الشيل والحط والإهانة. واللي بتزعق فيه ده، هو صاحب البيت.. والست اللي قاعدة زي الهانم دي، هي اللي واكلة ماله ومال دواوه! منى صرخت
انتي اتجننتي يا نورا؟ ده بيت جوزي وبيت أمي!
طلعت الورق، وضربته على السفرة
البيت ده باسمي.. والأرض باسمي.. والفلوس اللي اتنهبت دي أنا مصوراكي وانتي بتاخديها من التاجر يا حرامية! فتحي ملوش هنا قشة، والورق اللي مضيتيه عليه ده بليّه واشربي ميته، لأن مفيش حد بيورث وهو حي، ولا بيبيع اللي مملكوش!
الطرد.. والرجوع للحق
فوزية ومنى بقوا زي الفراخ المبلولة
وسط نظرات الاحتقار من أهل البلد. فتحي أخويا، لما شافني قوية وشاف وجع أهله عياناً بياناً، الراجل اللي جواه فاق.. قام وقف ونفض التراب من عليه وبص لمراته وقال الكلمة اللي كانت لازم تتقال من زمان
انتي طالق يا منى.. وخذي أمك واطلعي برا بيتي، وبرا حياتي.. الأرض دي طاهرة مابيمشيش عليها اللي بيظلم أهله.
رميت لها شنطتها في الطين، وطردتهم قدام الكل بجلابيبهم اللي كانوا فاكرينها هتداري وسخ قلوبهم.
النهاية رائحة الأرض الطيبة
عدت سنة..
الآن، أنا قاعدة في المصطبة مع أبويا وأمي. أبويا لابس جلابية بيضاء مكوية، وقاعد بيشرب شاي ومنور زي البدر. أمي قاعدة بتسقي الزرع وهي بتدندن، وضهرها ارتاح، وإيدها رجعت ناعمة وريحتها حنة. بقلم مني السيد
فتحي بقى هو اللي شايل الأرض، بيعوضهم عن كل يوم غاب فيه عقله. والبيت رجع له روحه.. مابقاش حيطان وسقف، بقى حضن دافي.
أما منى وأمها، فسمعنا إنهم بقوا خدامين عند اللي يسوى واللي ميسواش في البندر، والفلوس اللي سرقوها طارت في المحاكم والمصاريف.. كما تدين تدان، والبيت اللي يتبني على دمعة أب وأم، لازم يتهد على دماغ اللي بناه.
تمت.
بقلم مني السيد
