لما قال لي الجملة دي، افتكرت إن ربنا أخيرًا حنّ عليّا وبص في وشي. تخيلت نفسي، ولأول مرة من سنين طويلة، قاعدة بشرب قهوتي بهدوء الصبح، والبيت حواليا بيتنظف، بتفرج على مسلسلي المفضل، وحاسة بكرامتي كست بيت مرتاحة وليها قيمة.
كنت فاكرة إن تعب السنين هيهون… لكن أول ما مسكت الظرف في إيدي ولمحت النظرة اللي في عينيه، فهمت إن جوزي مش بيحاول يريحني… محمود كان بيعمل لي اختبار، فخ مسموم مرسوم بالمليم.
الحكاية بدأت يوم الاتنين.. محمود رجع من الشغل بوش قاسي ومتجهم، نفس الملامح الرخمة اللي بيلبسها لما يكون ناوي يرمي كلمة مستفزة، ويبقى مستني مني أقف أشكره وأبوس إيده عليها! رمى مفاتيحه على طرابيزة الصالون بعنف، وعينه بتلف في زوايا الشقة بتدوير على أي غلطة، وقال بنبرة فيها تعالٍ بصي يا هناء.. أنا فكرت ولقيت إن الشقة دي كبيرة عليكي، وإنتي
بقيتي بتشتكي وتتأوهي كتير من التعب. إحنا محتاجين نجيب واحدة تساعدك في التنظيف والمسح، مش عاوز أشوف كركبة تاني.
في اللحظة دي، أنا كنت هطير من الفرحة! بعد سنين كحت وقهر وسط المسح والغسيل، وتنظيف الحمامات، ولمّ الهدوم اللي مبيخلصش،
وكسرة الضهر اللي كانت بتنتهي كل يوم بالكلمة المستفزة بتاعته هو إنتي بتعملي إيه طول النهار؟ قاعدة بتتمنجهي؟.. حسيت إن باب السما اتفتح لي أخيرًا، وإن حقي رجع لي. بصيت له بابتسامة صافية وقلت له يا ريت يا محمود، فكرة حلوة أوي وهتريحني بجد.
تاني يوم الصبح، قبل ما ينزل، سحب من جيبه ظرف أبيض مقفول وحطه في إيدي بكبرياء.
قال لي دي فلوس الشغالة.. هتجيلك
كل أسبوع، والقرش ده مدفوع من قوتي عشان راحتك، فاهمة؟
فتحت الظرف بعد ما نزل.. المبلغ مكانش خزينة قارون،
بس كان معقول ويكفي واحدة تيجي يومين في الأسبوع تعمل الشغل الثقيل. بالليل ولما رجع، سألته بلهفة تسلم إيدك يا حبيبي.. طيب هي الشغالة دي
هتيجي إمتى؟ وكلمت مين؟
هنا.. لمحت على وشه ابتسامة غريبة، ابتسامة خبيثة صفرا عمري ما هنساها. قرب مني وقال ببرود الموضوع ده يرجع لك إنتي.. شوفي هتيجي إمتى وبراحتك.. المهم عندي إن البيت يفضل نظيف وعلى سنجة عشرة، وأرجع ألاقيه بيبرق.
مفهمتش لغز كلامه وقتها، وقولت يمكن سايب لي حرية الاختيار أدور على معرفتي.. لحد ما جه يوم الجمعة الصدمة!
كنت راجعة من السوق، شايلة الشنط الثقيلة وإيديا وجعاني. وأنا بقرب من باب الشقة، لقيت الباب موارب سنة، وسامعة صوته عالي في الصالة. محمود كان بيتكلم مع أمه حماتي فيديو كول ومشغل السبيكر.
وقفت مكاني متجمدة لما سمعته بيقول بضحكة لئيمة أيوه يا أمي.. نفذت الخطة بالظبط وإديتلها فلوس الشغالة أول الأسبوع.. سايبها بقى عايشة في الوهم، ونشوف الهانم هتعرف قيمة تعب البيت والقرش اللي بيتدفع، ولا هتاخد الفلوس لجيوبها!
ردت حماتي بضحكة عالية رنت في ودني زي السكينة يا ابني دي عمرها ما عرفت تدبر ولا تفهم في
الأصول! أنا عارفاها، أكيد هتطمع في الفلوس وتصرفها على لبس ومكياج وتضحك عليك بالكلمتين بتوعها، وتقولك إنها نظفت بنفسها عشان تلهف القرشين!
حسيت إن الدم اتجمد في عروقي، ونفسي اتقطع وأنا واقفة ورا الباب. بس الصدمة الأكبر كانت رد جوزي اللي كسر جوايا كل حاجة نظيفة..
ضحك وقال بأعلى صوته ولو نظفت بنفسها ولهفت الفلوس يبقى كسبت برضه يا أمي! أهو على
الأقل توفر عليا فلوس الشغالة الحقيقية، وتتحرك وتعمل الشغل وهي ساكتة وبنفس راضية فاكرة إنها بتغفلني! أنا عامل لها الفخ ده عشان أعرف آخرها إيه!
في اللحظة دي.. الدنيا لفت بيا. فهمت كل حاجة.. السنين اللي ضاعت من عمري مع الراجل ده اتلخصت في لقطة واحدة. هو مكنش بيحاول يساعدني ولا شاري راحتي..
ده كان عامل لي مصيدة، بيبتز تيت وحرقتي بفلوسه، وبيتريق عليا مع أمه في ضهري.. كان بيدفع لي تمن عرق جبيني وكسرة ضهري في بيتي، وفاكر إنه بيكسر عيني.
ليلتها.. محمود رجع ولقى العشا جاهز، والبيت بيبرق.
بص لي وابتسم بثقة وهو فاكر إنه انتصر.
وأنا؟ ماقولتش ولا كلمة.. بصيت له بنظرة هادية وباردة جداً.. نظرة الشخص اللي بيخطط لرد القلم بميت قلم!
الاثنين اللي بعده صحيت من النجمة، قلبي شغال ندب بس عقلي كان صاحي ومخطط لكل خطوة. لمّيت شعري، ولبست الجوانتي الأصفر وكأني داخلة حرب، ونضفت الشقة حتة حتة كأنها أوضة عمليات مِعقمة. دعكت الأرض لغاية ما ضهري اتقوس،
غسلت الشبابيك من التراب اللي كان كاتم على نفسي، عقمت الحمامات، ولمّعت خشب المطبخ ورخامه لدرجة إنه بقى يبرق ويعكس وشي المصدوم. كنت بطلع غلي وحسرتي في كل مسحة ونفضة.
ولما محمود رجع من الشغل بالليل، حط رجله من الباب وبص حواليه بانبهار وذهول، ورجع خطوتين ورا وصَفّر بإعجاب. بص لي وقال بنبرة فيها لؤم وفرحة مكتومة لا واضح إن الشغالة الجديدة دي إيدها تتلف في حرير وشاطرة أوي.. البيت ريحته تفتح النفس.
بلعت غصتي، ورسمت على وشي ابتسمت هادية وباردة وقلت
أيوه.. شغلها ممتاز ومبتسبش ففوتة، مكنتش متخيلة إنها هتريحني كدة. طلع المحفظة بثقة، وسحب ظرف جديد وحطه على الترابيزة وقال بغرور
امسكي.. ابقي اديهولها
لما تيجي الأسبوع الجاي، الست دي متفرطيش فيها. أخدت الظرف ببرود وقلت أكيد.. من عينيا.
ومن يومها الموضوع بقى روتين مريب.. روتين أسود. كل أسبوع كان يرمي لي الظرف بفلوس لست مش موجودة في الدنيا أصلًا، وأنا أنزل على ركبي أنضف البيت بنفسي وأموت من التعب، وأروح أخبّي الفلوس زي ما هي بظروفها في علبة جزم قديمة تحت السرير
بعد تلات شهور، كنت مجمعة مبلغ محترم، عمر محمود ما كان يتخيل في أحلامه إني أملك ذكاء أو قدرة إني أوفر قرش واحد منه! كنت بحس بالانتصار كل ما بفتح العلبة.. بس الانتصار ده كان قشرة، والضربة الحقيقية كانت مستنياني ورا الباب.
في يوم، كنت واقفة بمسح طرقة الشقة والهدوء مغطي المكان، وفجأة سمعت حس حركته وصوت همس مريب. المرة دي ماكنتش مكالمة فيديو مع أمه عشان يتريقوا عليا..
الصوت كان واطي، ناعم، وطالع من جوه الحمام الماستر. قربت بخطوات بطيئة زي الشبح، كتمت
نفسي وسندت ودني على خشب الباب.. ومحمود كان بيتكلم بلهفة وعشق مقرف مع واحدة ست!
كان بيقولها يا حبيبتي ما تقلقيش.. الصبر.. أول ما هناء الهبلة دي تمضي
على ورق التنازل بتاع الشقة، هرمي لها حاجتها في الشارع وهسيبها وآجي أعيش معاكي في عشك الجديد.. الشقة دي بتاعتي وتعب عمري ومش هسيبهالها.
في اللحظة دي، جردل الممسحة وإزازة المنظف وقعت من إيدي على الأرض.. عملت صوت، بس هو مندمج ومسمعش. قربت أكتر، وضوافري غرزت في حلق الباب وأنا بسمع الجملة اللي جمدت الدم في عروقي وشلت حركتي وبعدين الهبلة أصلًا ما تعرفش إن الشغالة شافت الورق كله وعرفت بوجوده.. أنا خايف الشغالة تفتش في المكتب وتاخده وتلوي دراعي بيه!
وقفت مكاني، نبضات قلبي بقت زي دقات طبول الحرب اللي بتهز الضلوع. الشغالة شافت الورق كله؟ الجملة دي كانت بتلف في دماغي زي الإعصار، بتمزق كل شعرة غفلة كانت فيا.
محمود الغبي فاكر إن في شغالة بجد بتدخل وتخرج في غيابه! وبما إنه عمره ما بيشوفها ولا بيقابلها، تلاقيه بحكم الإهمال ساب ورق مهم وخطير على مكتبه أو في دولابه، وجاله هوس وشك إن الست الشغالة دي اللي هي أنا! شافته وممكن تفضحه، أو تسرقه وتلوي دراعه بيه!
أدركت في اللحظة دي إن اللعبة كبرت ووسعت أوي.. وإن علبة الجزم اللي تحت السرير
واللي مليانة فلوس دي مش هتبقى كفاية ولا هتحميني. أنا مش بس باخد تمن تعبي وعرقي، أنا بقيت في وسط مؤامرة دنيئة لسرقة شقتي، ورميي في الشارع، وخراب بيتي كله.
فجأة سمعت صوت تكة الموبايل.. محمود قفل السكة ورايح يفتح باب الحمام. بسرعة البرق رجعت للمطبخ، مسكت الفوطة وعملت نفسي بمسح الرخام بهستيريا وإيديا بترتعش من الصدمة والغضب. طلع من الحمام، ملامحه كانت متوترة وبص لي بنظرة كلها برود وعينه بتجيب يمين وشمال وقال لي إيه يا هناء.. هي الشغالة جت النهاردة ونظفت ولا لسه ما شرفتش؟
بلعت ريقي بصعوبة، ولفيت له وبصيت في عينيه بثبات انفعالي وجبروت عمري ما تخيلت إني أملكه في حياتي، وقلت له بكل برود وهدوء آه.. جت ونظفت الأوضة الجوانية والمكتب، ومشيت قبل ما إنت تدخل الحمام ب خمس دقايق بالظبط!
بلمح البصر، وش محمود جاب ألوان.. الأزرق في الأصفر في الأحمَر! ملامحه اتمطت، وعينه زاغت بشكل مرعب، وبدون ولا كلمة جري على أوضة المكتب بتاعته كالمجنون يفتح الأدراج.
عرفت ساعتها إن السهم صاب في مقتل، وإن اللعبة بقيت على المكشوف.. وبدأت رسميًا رحلة البحث
عن الخيط!
تابع للجزء الثاني
تاني يوم الصبح،
محمود نزل الشغل وهو لابس وش القلق والخوف، عينه مكنتش بتثبت في مكاني وهو بيقفل زراير قميصه. أول ما صوت الباب اتقفل والترباس تُرِق، ميعاد الشغالة جِه!
بس المرة دي، الشغالة ممسكتش المقشة ولا لَبست الجوانتي الأصفر عشان تنظف؛ المرة دي الشغالة قلبت الشقة حتة حتة، وفتشت في كل خرم إبرة
وهي بتدور على الورق والمصيبة اللي بيتكلم عنها.
دورت في ضلف المطبخ العالية، ورا الكتب المرصوصة في الصالة، سحبت السجاد وفتشت تحته والغل بيحركني.. لحد ما وصلت لأوضة المكتب. وقفت قدام مكتبه الخشب، وبدأت أفتح الأدراج درج درج، لغاية ما وصلت للدرج اللي تحت خالص.. كان مقفول بقفل حديد صغير ومحكم.
وقفت ثواني بفكّر وعقلي شغال زاي المكنة، وفجأة افتكرت! محمود دايماً بيشيل مفاتيح الأقفال الزيادة دي في ميدالية مفاتيحه القديمة المرمية في درج الكومودينو جوه غرفتنا. جريت على جوه بقلب بيتنفض، سحبت الميدالية، ورجعت للمكتب.. وبإيد بترتعش حطيت المفتاح،
والتكة طلعت.. الدرج اتفتح.
وهنا.. كانت الصدمة الكبرى اللي هدت اللي باقي من طوقتي، ورق مرصوص ورا بعضه كأنه أحراز قضية إعدامي
أولاً تنازل عام عن الشقة ورق رسمي ومكتوب بدقة ومحامي شيطان، صيغة بتقول إن أنا هناء بتنازل بكامل إرادتي عن الشقة ونصيبي الشرعي اللي بابا الله يرحمه كتبهولي باسمي قبل ما يموت عشان يأمن مستقبلي! الورق ده كان جاهز ومكتوب، وناقصه
بس حاجة واحدة.. إمضتي وزور إيدي!
ثانياً عقد زواج عرفي عقد مكتوب من شهور باسم محمود.. وبنت ثانية اسمها رشا! وهي دي الحية اللي كان بيكلمها من جوه الحمام وبيتفق معاها على رميتي.
ثالثاً وصلات أمانة بملايين صدمة الصدمات.. محمود طلع غرقان
في الديون، واخد فلوس من طوب الأرض وممضي على نفسه وصلات أمانة توديه ورا الشمس،
وكان ناوي يسرق شقتي ويبيعها من ورا ظهري عشان يسدد ديونه البلاوي دي، ويهرب بالقرشين الباقيين مع الست التانية!
قعدت على كرسيه، وفهمت الخطة كاملة كأنها شريط سينما بيتعرض قدام عيني محمود الغبي مكنش بيسيب الورق ده بالإهمال، ده كان بيسيبه على المكتب عمداً عشان الشغالة الوهمية تلمحه فتاخد بالها إن في ورق مهم، وبما إن الشغالة مش هتقول لي لأنها مش موجودة أصلاً فهو كان بيطمن إن مفيش عين غريبة هتكشفه.
وكان ناوي في وسط الزحمة والدوشة، يدخل عليا في يوم ب وش الحنين، ويقول لي امضي يا هناء على الورق ده تبع إجراءات صيانة العمارة والاتحاد، ويخليني أمضي على ورق التنازل وسط ورق الصيانة من غير ما ألمح المكتوب!
نزلت من على الكرسي وقعدت على الأرض، والدموع مغرقة عيني ونازلة تحرق في خدودي.. بس المرة دي مكنتش دموع ضعف ولا انكسار، دي كانت دموع غضب أعمى، دموع ست عقلها بيبخر شرار.
بصيت للورق اللي في إيدي، وضغطت عليه لغاية ما اتكرمش في قبضتي، وقلت لنفسي بنبرة حاسمة وصوت يشبه الفحيح بقى بتستغفلني
يا محمود؟
بتشغلني شغالة بعرقي الشقا في بيتي، وبتخطط في ضهري تسرق شقة أبويا وترميني في الشارع عشان خاطر رشا؟! ورب العزة وجلالة الله لأدفعك التمن غالي أوي، وهخلي الشغالة دي هي اللي توديك في داهية ب إيدها!
سحبت الموبايل، وصورت كل ورقة من دول فيديو وصور واضحة، ورجعت كل حاجة مكانه بالملي، وقفت قدام المراية وأنا بمسح دموعي وبلبس وش البرود.. اللعبة دلوقتي بقت لعبتي أنا!
رجعت كل حاجة مكانها بالملي، ومسحت آثار صوابعي من على الخشب. وقفت في نص الصالة،
أخدت نَفَس طويل، وحسيت بقوة غريبة بتجري في دمي. الغل والحسرة اتمسحوا، وحل مكانهم ذكاء ست مفيش قدامها غير إنها تنتصر. قسمّت خطتي على تلات مراحل مدروسة زي الساعة
جريت على أوضة النوم بقلب جامد، نزلت على ركبي وسحبت علبة الجزم القديمة من تحت السرير. فتحتها وبصيت للفلوس.. تحويشة 3 شهور كاملين من المرتب اللي كان بيدفعهولي لست مش موجودة أصلاً. لميت الكاش كله في شنطتي، ونزلت فوراً على البنك. فتحت حساب سري ملوش أي كارت، وباسم مشترك بيني وبين والدتي، وحطيت الفلوس فيه عشان ميبقاش في البيت مليم واحد كاش يمسكه عليا أو يشك فيه. أمنت تعبي وعرقي.
رجعت الشقة، سحبت ورقة بيضاء من كشكول قديم، ومسكت القلم بإيدي الشمال وغيرت طريقة خطي تماماً، خليته خط مايل ومهزوز كأن اللي كاتباه ست بسيطة يدوب بتفك الخط، وكتبت الجملة اللي هتكون حبل المشنقة
يا أستاذ محمود،
أنا شفت الورق اللي في الدرج المقفول، وعرفت إنك متجوز على مدام هناء وناوي تسرق شقتها وتبيعها. لو مش عاوزني أقول لها وأخرب بيتك، تحط لي 50 ألف جنيه حالا في الظرف بتاع الأسبوع الجاي، وإلا قسمًا بالله الورق ده كله هيكون على مكتب المدام أول ما تصحى!
حطيت الورقة المسمومة دي جوه ظرف الفلوس الفاضي اللي كان سابهولي على الترابيزة عشان أديه للشغالة، ودخلت أوضة المكتب، وحطيته في نص مكتبه بالظبط عشان عينه تقع عليه أول ما يدخل.
يوم الجمعة بالليل.. محمود رجع من بره وشه باهت من الإرهاق. دخل أوضة المكتب فوراً عشان يطمن على الظرف اللي المفروض إن الشغالة استلمته. في اللحظة دي، أنا كنت واقفة ورا باب المطبخ، ماسكة حلة وبعمل نفسي بحضر العشا، وعيني مثبتة عليه من فتحة الباب ب راقبه وبشوف العرض.
أول ما فتح الظرف وسحب الورقة وقرأ المكتوب.. ملامحه اتخطفت! وشه بقى أبيض زي لون الكفن، وبدأ يتنفس بسرعة بهستيريا وعرقه ينزل يغرق ياقة قميصه. في نفس اللحظة، تليفونه رن برنة عالية خضته، كانت أمه حماتي.
سند ظهره على الحيطة، وسمعته بيقولها بصوت مرعوب، مبحوح وميت من الخوف الحقيني يا أمي.. المصيبة وقعت فوق دماغي! الشغالة طلعت حرباية ومقروصة وبتلوي دراعي! دخلت المكتب وشافت ورق الجواز العرفي من رشا وورق التنازل عن الشقة، وكاتبة لي رسالة بتطلب 50 ألف جنيه فدية في ظرف 48 ساعة.. وإلا هتحط الورق كله قدام هناء!
على
الناحية التانية،
صوت حماتي طلع من الموبايل وهي بتصوت وتلطم على وشها يا مصيبتك السودا يا محمود! يا نهارنا مش فايت! ادفع لها.. ادفع لها فوراً والبركة في المستور! القرش يروح بس البت هناء ما تعرفش حاجة.. دي لو عرفت هتطردك من الشقة بالهدوم اللي عليك، وتوديك في ستين داهية بوصلات الأمانة اللي عليك لطوب الأرض! اتصرف وهات الفلوس!
محمود قفل الخط وهو بينهج كأنه بيغرق. وطبعاً، عشان يلحق رقبته ويحمي فضيحته، اضطر ينزل تاني يوم الصبح من النجمة، يلف على الفروع ويسحب كل قرش حيلته في البنك عشان يجهز الفدية للشغالة الشبح!
يوم الإثنين.. محمود قبل ما ينزل الشغل، حط ظرف منفوخ وتقيل جداً على الترابيزة. بص لي وعينه في الأرض، صوته كان بيترعش من قلة النوم وقال لي هناء.. ابقي ادي الظرف ده للشغالة أول ما تيجي.. وقولي لها الأستاذ بيقولك خلاص كده الحساب صفي بالمليم، ومش عاوزين نشوف وشك في البيت هنا تاني.. أنا هتعاقد مع شركة تنظيف محترفة بعد كده.
رسمت على وشي ابتسامة عريضة، ابتسامة هادية ومنورة، وقلت
له بنبرة كلها حنان مزيف من عيوني يا حبيبي.. الأمانة دايماً بتوصل لأصحابها، متقلقش خالص.
أول ما نزل وسعت السكة، قفلت الباب ورايا بالترباس. مسكت الظرف وفتحته.. ال 50 ألف جنيه كاملين بين إيديا! في اللحظة دي، طلعت موبايلي وكلمت المحامي بتاعي اللي كنت مرتبة معاه كل حاجة، وطلبت منه يجيلي البيت فوراً ومعاه اتنين شهود من جيراننا في روض الفرج اللي عارفين أصلي وعارفين الشقة دي شقة أبويا الله
يرحمه.
فتحت درج المكتب قدامهم بالمفتاح، وسلّمت المحامي أحراز القضية ورق التنازل المزيف، عقد الجواز العرفي من رشا، ووصلات الأمانة الثقيلة. المحامي بص لي بإعجاب وقال كده إنتي حطيتي المشنقة حوالين رقبته.. معاكي قضية تزوير، وقضية خيانة أمانة، وحقك في الشقة دي محمي ومستحيل يلمس منه شبر، وتقدري تخلعيه وتحبسيه في نفس الساعة!
ساعة واحدة بالظبط.. وكان محمود راجع من الشغل بدري جداً، داخل وجسمه بيلتفت حوالين نفسه عشان يطمن إن الشغالة أخدت الفلوس وغارت من البيت.
فتح باب الشقة ودخل.. لقى الأنوار كلها مطفية، والبيت هس هس.. مفيش غير أباجورة واحدة منورة باللون الأصفر الهادي في زاوية الصالون.
كنت قاعدة على الكرسي الفوتيل الرئيسي، حاطة رجل على رجل بكل برود وجبروت. في إيدي اليمين كباية القهوة السخنة اللي كنت بحلم أشربها بروقان من سنين، وفي إيدي الشمال الظرف المليان بال 50 ألف جنيه.. وعلى الطرابيزة قدامي برعب؟ ورق جوازه العرفي، ووصلات أمانته، وعقد التنازل!
محمود وقف في مكانه كأنه اتضرب بالرصاص.. لسانه اتمسك، وعينه برقت لدرجة الصدمة، بص للورق وبص لي، وبدأ يتلعثم ووشه بيجيب ألوان هناء.. إنتي.. إيه
ده؟ ومين اللي جاب الورق ده هنا على التربيزة؟ الشغالة هي اللي سابته؟ هي اللي قادتك؟
قاطعته بضحكة عالية وقوية رنت في أركان الشقة الضيقة وسَمّعت الحيطان. وقفت بكل ثقة وطول، قربت منه لغاية ما بقيت في وش عينه، ورميت ظرف ال 50 ألف جنيه في صدره بقوة وقلت له بنبرة هزت
الأرض تحت رجليه
الشغالة بتسلم عليك وبتشكرك جداً وبتقولك.. الشغل معاك كان ممتع ومربح جداً يا حودة! تلات شهور كاملين باخد منك مرتب الشغالة وأحوشه في البنك بعرق جبيني، والنهاردة.. أخدت منك مكافأة نهاية الخدمة 50 ألف جنيه كاش!
محمود فتح بوقه، وعينه زاغت من الذهول والخراب اللي حل فوق دماغه وهمس بصوت مش طالع إنتي؟! إنتي اللي كنتِ الشغالة؟! يعني مفيش حد دخل البيت؟!
بصيت له ببرود قاتل وابتسامة خَلّت ركبه تسيب آه يا محمود.. أنا اللي نظفت بيتك، وأنا اللي كشفت ألاعيبك الدنيئة وخيانتك. كنت فاكر إنك بتعمل لي فخ ذكي عشان توفر فلوس وتطلعني قدام أمك هبلة ومبدبرش؟ بس الهبلة دي يا حودة.. هي اللي لفت حبل المشنقة حوالين رقبتك، والمحامي والشهود بره مستنيين إشارة مني عشان يودوك المكان اللي يستحقك.. ورا الشمس!
محمود حاول يثور، وشه احمرّ وعروق رقبته برزت وهو بيحاول يرفع صوته ويزعق عشان يخوفني ويداري على خيبته وصدمته. بس بكل برود، شاورت له بصباعي على باب الأوضة الجوانية.. الباب اتفتح، وطلع منه المحامي وبجنبه اتنين من كبار الجيران والشهود. في اللحظة دي بالظبط، السكوت نزل على الصالة، وركب محمود خبطت في بعضها، وعينه بدأت تزيغ بيني وبينهم وهو مش قادر يستوعب الإحكام اللي وقع فيه.
المحامي قرب منه، سحب قسيمة الطلاق من الشنطة وحطها
قدامه على الطرابيزة، وبص له بلهجة صارمة، حاسمة ومفيهاش أي مجال للمناهدة بص يا أستاذ محمود.. إحنا هنا مش عشان نتفاوض، قدامك حالا حل من
اتنين ملهومش ثالث.. إما تمضي على قسيمة الطلاق دي بالإبراء، وتتنازل عن كل مستحقاتك، وتسيب الشقة دي بملابسك الشخصية وبس حالا، أو الورق ده كله عقد التنازل المزور، ووصلات الأمانة اللي بملايين، وعقد جوازك العرفي من رشا هيكونوا على مكتب وكيل النيابة الصبح أول ما الشمس تطلع.. وطبعاً إنت راجل متعلم وعارف عقوبة التزوير وخيانة الأمانة هتقعدك كام سنة ورا الشمس.
محمود بص للورق، وبعدين بص للأرض وعينه اتملت بدموع الندم، الكسرة، والخزي اللي غسلت كل كبريائه المزيف. في اللحظة دي، فهم إن اللعبة انتهت رسميًا، وإن الشغالة اللي كان بيستهزء بيها وبيتريق عليها مع أمه في ضهرها، طلعت أذكى منه ومن أمه بمليون مرة، وسبقته ب ميت خطوة.
مسك القلم بإيد مرعوشة وبتترعش، ومضى على ورق الطلاق وهو ساكت تماماً، مطلعش منه ولا همسة. دخل أوضة النوم زي الشبح، لم هدومه
كلها في شنطة واحدة بسرعة، وخرج من باب الشقة وهو جارد ظهره، ومش قادر حتى يرفع عينه ويحطها في عيني.
وقفت وراه، وقَفلت الباب وراه بالمفتاح والترباس.. تكة القفل دي كانت أحلى صوت سمعته في حياتي.
لفيت وبصيت للشقة الواسعة، النظيفة، الشقة اللي بقت ملكي لوحدي ومحدش هيشاركني فيها ولا هيستغلني جواها تاني. رحت قعدت على الكنبة بروقان، سحبت كباية القهوة اللي بردت شوية، وأخدت نَفَس عميق وطويل من قاع قلبي.. نَفَس كله حرية. شربت بق من القهوة، ولأول مرة من سنين طويلة، حسيت بالراحة الحقيقية.. حسيت إني ست بيت مرتاحة، قوية.. ومنتصرة!
تمت بحمد الله.
