جريت عليها وأنا مش فاهم أي حاجة. فتحت عينيها ببطء، وبصتلي بخوف حقيقي، وقالت بصوت ضعيف: “حسن… لو كنت شفت اللي حصل… متسبنيش… أنا مش باعمل كده بإرادتي.”
وقفت مصدوم وأنا سامع كلامها. لأول مرة أشوف الخوف الحقيقي في عيني يارا. ما كانش خوف واحدة اتكشف سرها… كان خوف إنسانة مستنية حكم بالإعدام. مسكتها من كتفها وقلت: “يعني إيه مش بإرادتك؟” دموعها نزلت وهي بتحاول تقوم، وقالت: “لو حبيتك… يبقى لازم تعرف الحقيقة كلها.” رجعنا البيت قبل ما حد يشوفنا، وقعدنا في أوضة الضيوف. كانت الشمس لسه ما طلعتش، وصوت الديوك بدأ يملأ البلد. يارا فضلت ساكتة شوية، وبعدها قالت: “أنا اتولدت في قرية بعيدة في قلب الجبل. أبويا مات وأنا صغيرة، وأمي كانت بتشتغل عند ست عجوز الناس كلها كانت بتخاف منها. كانوا بيقولوا إنها بتعرف أسرار قديمة محدش بقى يفتكرها.”
كنت بسمع من غير ما أقاطعها.
قالت: “وأنا عندي عشر سنين، دخلت الأوضة اللي كانت ممنوع أدخلها. لقيت صندوق خشب قديم، أول ما فتحته، لقيت فيه تميمة غريبة على شكل حية ملتفة. أول ما لمستها، الست العجوز صرخت فيا، وقالت إن اللعنة اختارتني.”
حسيت بقشعريرة سرت في جسمي.
كملت وهي بتعيط: “افتكرت إنها بتخوفني. لكن بعد كام سنة، أول مرة يكتمل فيها القمر، صحيت لقيت نفسي في الغيط، وحوالي بقايا خرفان نافقة. ومن يومها، كل شهر بيتكرر نفس الكابوس.”
قلت بغضب: “طب ليه ما قولتيليش؟”
بصت في الأرض وقالت: “كنت خايفة تسيبني. وكل ما كنت أحاول أحكيلك، كنت بفقد الوعي قبل ما أنطق.”
فضلت ساكت.
العقل كان رافض يصدق.
لكن عيني شافت اللي شافته.
وفي عز الكلام، سمعنا خبط عنيف على باب البيت.
خرجت فتحت.
لقيت عم رمضان واقف، ووشه أصفر.
قال وهو بينهج: “يا حسن… الحقني.”
قلت: “في إيه؟”
قال: “الجاموسة الكبيرة بتاعة الحاج بدوي اختفت… والأرض كلها عليها أثر زحف ضخم.”
خرجت معاه.
البلد كلها كانت متجمعة.
الأثر كان واضح في الطين.
خط عريض جدًا.
كأن حاجة وزنها أطنان عدت من هناك.
الناس ماشية وراه لحد ما وقف الأثر قدام بيتي.
كل العيون اتوجهت ناحيتي.
واحد من الشباب قال: “مش قولنا فيه حاجة غريبة في البيت ده.”
والتاني قال: “من يوم ما البنت دي دخلت البلد والمصايب ورا بعضها.”
بدأ الهمس يزيد.
وأمي خرجت من البيت وهي مش فاهمة.
بصت للأثر.
وبعدين بصتلي.
وقالت: “إيه اللي بيحصل يا حسن؟”
قبل ما أرد…
طلع صوت الشيخ عبدالرحمن، إمام الجامع.
كان واقف وسط الناس، وقال بهدوء: “محدش يظلم حد من غير دليل.”
سكتت البلد كلها.
قرب من الأثر، وقعد يتأمله شوية.
وبعدين رفع رأسه وقال: “دي مش آثار حية عادية.”
واحد سأله: “أمال إيه يا مولانا؟”
رد: “معرفش… لكن اللي أعرفه إن الخوف مش هيحل المشكلة.”
لف ناحيتي وقال: “بعد المغرب تعالى قابلني.”
طول اليوم وأنا مستني.
أول ما صلينا المغرب، دخلت المسجد.
استناني لحد ما الناس كلها خرجت.
فتح باب أوضة صغيرة جنب المحراب
وقال: “اقفل الباب.”
نفذت كلامه.
راح ناحية مكتبة قديمة، وطلع منها مخطوطة جلدية متآكلة.
نفخ عنها التراب، وفتحها بحذر.
كانت مليانة رسومات لحيوانات وثعابين وأساطير قديمة.
وأشار على رسم يشبه اللي شوفته بعيني.
وقال بصوت منخفض:
“أنا كنت فاكر إن الحكايات دي انتهت من مئات السنين… لكن واضح إن الماضي رجع يطاردنا من جديد.”
بصيت للرسم وأنا حاسس إن نفسي اتقطع. كان شبه اللي شوفته بالليل بالحرف. نفس الجسم الضخم، ونفس العينين اللامعتين، وحتى العلامة الصغيرة اللي كانت على جانب الرقبة. رفعت عيني للشيخ عبدالرحمن وقلت: “يعني اللي شوفته كان حقيقي؟”
قفل المخطوطة بهدوء وقال: “سواء كان حقيقي أو لا… لازم تتعامل معاه بعقل. الخوف أكبر عدو للإنسان.”
قلت: “بس مراتي قالت إنها مش بتعمل كده بإرادتها.”
هز رأسه وقال: “وده اللي خلاني أطلبك.”
سكت شوية قبل ما يكمل.
“في الحكايات القديمة كانوا بيقولوا إن فيه ناس بتصاب بلعنة، وتفضل تحاربها طول عمرها. وأنا مقدرش أجزم إن ده اللي بيحصل مع مراتك، لكن اللي متأكد منه إنك لازم تحميها وتحمي نفسك لحد ما نفهم الحقيقة.”
خرجت من المسجد وأنا دماغي هتنفجر من التفكير.
رجعت البيت.
لقيت يارا قاعدة في الجنينة، باصة للسماء.
أول ما شافتني وقفت.
وقالت: “كنت عند الشيخ.”
استغربت.
“عرفتي منين؟”
ابتسمت ابتسامة حزينة.
“أنا بحس.”
قعدت قدامها.
وحكيتلها كل اللي قاله.
فضلت ساكتة، وبعدها دخلت الأوضة، ورجعت وهي شايلة صندوق خشب صغير.
حطته قدامي.
وقالت: “أنا مخبياه من يوم فرحنا.”
فتحته.
كان جواه سلسلة فضة قديمة، ورسالة مكتوبة بخط باهت.
بدأت أقرا.
“لو وصلت الرسالة دي لحد، يبقى اعرف إن اللعنة بدأت ترجع. النجاة مش في الهروب… النجاة في معرفة أصلها.”
تحت الرسالة كان فيه اسم.
“ليلى.”
قلت ليارا: “مين ليلى؟”
قالت: “أمي.”
سألتها: “هي فين دلوقتي؟”
نزلت دمعة من عينها.
“اختفت… في نفس الليلة اللي شافتني فيها أول مرة أتحول.”
فضلت ماسك الرسالة.
وفي آخرها كان فيه عنوان لبيت قديم في قرية مهجورة على أطراف الجبل.
تاني يوم، بعد قررت أروح هناك.
رغم اعتراض أمي، ورغم خوف يارا، ركبت حماري واتجهت ناحية الجبل.
الطريق كان طويل، وكل ما أقرب، البيوت تقل، لحد ما وصلت قرية مفيهاش غير بيوت مهدمة وسكون غريب.
وسط الخراب كان فيه بيت واحد لسه واقف.
بابه نص مفتوح.
دفعت الباب بإيدي.
طلع صوت صرير طويل.
دخلت بحذر.
التراب مغطي كل حاجة.
لكن كان واضح إن حد دخل المكان من فترة قريبة.
لقيت على الترابيزة فانوس قديم، وكوب شاي ناشف، وآثار خطوات خارجة من الأوضة الخلفية.
مشيت وراها.
أول ما وصلت آخر الممر، سمعت صوت ست كبيرة بتقول من الضلمة:
“اتأخرت يا حسن… كنت مستنياك من يوم ما اتجوزت يارا.”
اتجمدت مكاني.
وقبل ما أنطق بحرف، خرجت عجوز شعرها أبيض بالكامل، وكانت ماسكة في إيدها نفس التميمة المرسوم شكلها في المخطوطة.
بصتلي مباشرة وقالت:
لو عايز تنقذ مراتك… لازم تعرف الحقيقة اللي اتدفنت من أكتر من عشرين سنة.”فضلت واقف مكاني، وإيدي على الباب، وأنا مش عارف أدخل ولا أرجع. العجوز كانت بتبصلي بثبات غريب، كأنها عارفة كل حاجة عني من قبل ما أولد.
قالت بهدوء: “متخفش… لو كنت عايزة أضرك، ماكنتش استنيت لحد ما تيجي برجليك.”
دخلت بحذر.
قفلت الباب ورايا.
البيت من جوه كان أقدم بكتير مما توقعت.
ريحته خشب قديم وأعشاب ناشفة.
وعلى الحيطان كانت معلقة صور باهتة لناس معرفهمش.
لكن صورة واحدة شدت انتباهي.
كانت صورة يارا.
بس مش وهي كبيرة…
وهي طفلة عندها يمكن عشر سنين.
واقفة جنب أمها.
وجنبهم نفس العجوز اللي قدامي.
قلت باستغراب: “إنتِ تعرفي يارا من زمان.”
ابتسمت.
وقالت: “أنا الداية اللي ولدتها.”
سكتت لحظة.
وبعدين كملت: “وأنا آخر واحدة شافت أمها قبل ما تختفي.”
