رفعت عيني وبصيت لمنة، وشها كان أبيض كأنه ميت وخالي من الروح، وفي اللحظة دي.. الباب اتدب عليه برجلين وإيدين وبطريقة مرعبة هزت الحيطة.
وصوت طارق لعلع في الممر والمنور برة والكل سمع
افتحي يا منة! أنا عارف إنك مستخبية جوة عند أهلك! هاتي دفتر التوفير والحاجة اللي من بيتي وإلا هطربق البيت ده فوق دماغك ودماغ أهلك النهارده.
في ثانية واحدة، البيت كله سكت، ومبقاش فيه غير صوت دقات الباب المرعبة اللي كانت بتتهز معاها الحيطان.
أمي بصت للباب بغريزة الخوف والقلق، ولتفتت ل منة وقالت بصوت واطي
ده.. ده صوت طارق؟ هو إيه اللي جابه وراكي بالسرعة دي؟
وش منة اتقلب وبقى أبيض كأنه ميت وخالي من الروح، وجريت بلهفة ورعب على الترابيزة عشان تخطف دفتر التوفير الأحمر وتداريه.
لكني سحبت إيدها بسرعة وثبتها مكانها وقولت بصوت ناشف
سيبيه.. متلمسيهوش وخليكي مكانك.
افتحي يا منة! افتحي وبلاش شغل عيال! أنا عارف إنك مستخبية جوة عند أهلك وسامع صوتكم! هاتي الحاجة اللي سرقتيها من بيتي واخرجي بالذوق وإلا هطربق البيت ده فوق دماغكم كلكم النهارده!
وملحقتش الكلمة تخلص، إلا وصوت أمه أم طارق الحاجة نادية لعلع ورا منه، وصوتها كان أشد وأقوى وجايب آخر الشارع
افتحوا يا ناس يا اللي جوة! افتحوا يا آل عبد الرحمن! إحنا ناس بنعرف الأصول ومابنتبليش على حد، بنتكم خرجت من بيتنا بالترضي والطلاق، تروح تمد إيدها وتسرق حاجتنا؟ اخرجوا وقولوا كلمة حق، وإلا الفضيحة هتبقى بجلاجل وسط الحتة كلها!
في ثواني، كان فيه جيران من الأدوار اللي فوق واللي تحت فتحوا أبوابهم وبدأوا يبصوا من على السلم عشان يتفرجوا على الهيصة والزيطة دي.
مشيت بخطوات ثابتة وفتحت الباب على آخره.
كان طارق واقف في الوش بالظبط، لسه ببدلته وشياكته بس وشه كان عرقان ومغلول، وعينيه بتلف في الشقة يدور على منة. وبجنبه كانت أمه واقفة، لافة طرحتها وشايلة في إيدها كيس قماش أسود، ووشها كله شر وجبروت.
أول ما أم طارق شافتني، زقت ابنها وكانت عايزة تنط جوة الشقة، وقالت بزعيق
أهو.. كويس إن الأخت الكبيرة العاقلة هنا! تعالي بقا شوفي عمايل أختك المصونة! بقالها تلات سنين قاعدة في خيرنا، واكلة شاربة نايمة، وفي الآخر تخرج من بيتنا سارقة ومستغفلينا!
وقفت في وسط الباب وسديت الطريق بضهري وقولت بنبرة باردة وناشفة
أختي سرقت إيه يا حاجة؟ قولي كلام تتسألي عليه قدام ربنا.
أم طارق عينها لفت في الصالة، ولمحت دفتر التوفير الأحمر محطوط على الترابيزة في النور. عينيها لمعت بالطمع، وراحت مادة إيدها بسرعة من جنب كتفي عشان تخطفه وهي بتقول
أهو! هو ده! الدفتر ده سارقاه من وسط الشنط وهي ماشية! ده بتاعنا ولازم ناخده ونقفل الحساب اللي بيننا!
طاخ!
ضربت إيدها بكل قوتي ونزلتها الأرض، وقولت بصوت زلزل السلم
إيدك لتتكسر قبل ما تلمسي حاجة مش بتاعتك! قولتلك ميت مرة أختي مابتمدش إيدها على حاجة غيرها!
وش أم طارق احمر وغضبت وعروقها نفرت وقالت بصوت عالي عشان تلم الجيران
جرى إيه يا ختي! انتي هتعملي فيها سبع الرجال وتمدي إيدك عليا في بيتكم؟ الدفتر ده دفتر جهازها ودخلت بيه بيت ابني، وطالما عاشت معاه تلات سنين يبقى الفلوس دي حق ابن mنها وماله، وهي دخلت بيتنا بالهدوم اللي عليها وتطلع بالهدوم اللي عليها، لكن الفلوس دي ملك بيت جوزها!
لفيت وشي وبصيت لطارق اللي كان واقف ورا أمه وساكت، وقولتله
وانت يا طارق؟ موافق على الكلام ده؟ شايف إن الفلوس دي حقك؟
