بقلم ندى الجمل
أمينة الشرطة فتحت باب الحجز، وقالت بهدوء:
“المحامي مستني.”
خرجت ليلى وهي مش قادرة تستوعب.
من أول ما دخلت القسم، ما كانش في دماغها غير سؤال واحد:
إزاي الحاجة سعاد تبعتلها جواب قبل وفاتها؟
دخلت غرفة صغيرة.
كان فيها راجل في أواخر الخمسينات، لابس بدلة سودة، وحاطط قدامه ظرف أبيض مقفول بالشمع الأحمر.
وقف أول ما شافها.
وقال:
“مدام ليلى؟”
هزت رأسها.
مد إيده بالظرف.
“أنا المحامي عصام رفعت. الحاجة سعاد سلمتني الظرف ده من أسبوعين، وقالتلي بالحرف: لو حصلي أي حاجة قبل آخر الشهر… سلمه لليلى بنفسك.”
حست ليلى إن الأرض بتميد بيها.
همست:
“كانت عارفة إنها هتموت؟”
رد المحامي:
“ما قالتش كده… لكنها كانت خايفة.”
في نفس الوقت…
كان الرائد كريم بيتابع الحوار من خلف الزجاج.
سمح لليلى تفتح الظرف، لأنه بقى جزء من التحقيق.
طلعت منه ورقتين وصورة قديمة.
الصورة كانت لأحمد وهو صغير، واقف جنب شاب يشبهه جدًا.
تحت الصورة مكتوب بخط الحاجة سعاد:
“الحق عمره ما بيموت… حتى لو اتدفن سنين.”
بدأت ليلى تقرأ الرسالة، وصوتها كان بيرتعش.
“يا ليلى…
لو الرسالة دي وصلتلك، يبقى أنا فشلت أصلح كل اللي بوظته بإيدي.
ظلمت ناس كتير… وسكت على أخطاء أكبر مني.
ويمكن أكتر واحدة ظلمتها في حياتي… هي إنتِ.”
وقفت ليلى عن القراءة.
دموعها نزلت لأول مرة.
قالت بصوت مبحوح:
“هي… بتعتذرلي؟”
الرائد كريم طلب منها تكمل.
رجعت تبص في الورقة.
“لو أحمد أصر يكمل الجوازة، يبقى اعرفي إنه ما يعرفش الحقيقة كاملة.
وفيه شخص قريب جدًا منه، بيخبي عنه سر لو عرفه… عمره ما هيبص لنفسه في المراية تاني.”
رفع الرائد عينه بسرعة.
“اسم الشخص مكتوب؟”
قلبت ليلى الورقة.
لكن آخر سطر كان مقطوع.
الجزء الأخير من الرسالة…
ممزق.
في اللحظة نفسها…
دخل أمين الشرطة يجري.
“يا فندم!”
وقف الرائد.
“خير؟”
“فتشنا بيت المرحومة بالكامل.”
“ولقيتوا إيه؟”
“لقينا مكان الرسالة… لكن واضح إن حد سبقنا وخد الورقة الناقصة.”
ساد الصمت.
يعني…
في حد دخل البيت بعد الوفاة.
وكان عارف بالظبط بيدور على إيه.
خرجت ليلى من غرفة التحقيق، وهي ماسكة الصورة بإيديها.
بصت فيها مرة تانية.
وفجأة اتجمدت.
قربت الصورة من وشها.
وقالت للرائد:
“استنى…”
“إيه؟”
أشارت على الشاب اللي واقف جنب أحمد.
“أنا شفته قبل كده.”
الرائد اتفاجئ.
“فين؟”
ردت وهي بتحاول تفتكر:
“في يوم كتب الكتاب… كان واقف بعيد وسط المعازيم، ولما حصلت الفوضى… اختفى.”
قبل ما الرائد يسألها أي سؤال تاني…
رن موبايله.
رد بسرعة.
وبعد ثواني، اتغير لون وشه.
“إيه؟!”
سكت لحظة، ثم قال:
“اقفلوا كل المخارج… محدش يخرج.”
ليلى بصتله بخوف.
“فيه إيه؟”
بصلها وقال:
“ريم… اختفت.”
“ريم اختفت.”
الجملة وقعت على ليلى كأنها صاعقة.
بصت للرائد كريم وقالت بعدم تصديق:
“يعني إيه اختفت؟”
رد وهو بيلم أوراقه بسرعة:
“خرجت من بيتها من ساعتين، ومن وقتها مفيش أي حد شافها.”
سألته:
“وأحمد؟”
“هو بنفسه اللي بلغ.”
بعد أقل من ساعة…
وصل الرائد كريم إلى شقة ريم.
كان الباب مفتوحًا، لكن مفيش أي آثار اقتحام.
الشقة هادية بشكل غريب.
فنجان قهوة لسه على الترابيزة.
وشنطة يدها موجودة.
لكن صاحبتها…
اختفت.
لف الرائد بعينيه في المكان.
كل حاجة كانت في مكانها، إلا إطار صورة واقع على الأرض.
رفعه.
كانت صورة جماعية من حفلة في الشركة.
أحمد واقف في النص.
وريم جنبه.
وفي آخر الصف…
نفس الشاب اللي ظهر في الصورة القديمة عند الحاجة سعاد.
همس الرائد:
“إنت مين؟”
في القسم…
استدعى الرائد أحمد.
دخل أحمد وهو مرهق، وعينيه حمرا من السهر.
قعد قدام الضابط.
“آخر مرة شفت ريم إمتى؟”
تنهد أحمد.
“بعد ما خرجت من القسم.”
“قالتلك رايحة فين؟”
“قالت إنها محتاجة تبقى لوحدها.”
الرائد قرب الصورة من أحمد.
“تعرف الراجل ده؟”
أول ما أحمد شاف الصورة، ملامحه اتبدلت.
لكن بسرعة حاول يخفي ده.
قال:
“لأ.”
الرائد ابتسم ابتسامة خفيفة.
“الغريبة إن الكاميرا صورتك وإنت بتسلم عليه في حفلة الشركة.”
اتوتر أحمد.
وبدأ يفرك إيده.
“كان… كان عميل.”
“اسمه؟”
سكت.
ثانية…
واتنين…
وثلاثة…
لحد ما قال:
“مش فاكر.”
الرائد قفل الملف.
وقال بهدوء:
“واضح إنك فاكر أكتر مما بتقول.”
في المساء…
رجعت نهى، الخادمة القديمة، للقسم مرة تانية.
كانت ماسكة صندوق خشب صغير.
قالت:
“لقيته في المخزن اللي الحاجة سعاد كانت كاتبة عنه.”
فتح الرائد الصندوق.
كان جواه مذكرات قديمة.
وعدة صور.
وشريط كاسيت قديم.
وفي آخر الصندوق…
مفتاح عليه ورقة صغيرة.
مكتوب عليها:
“افتحوا الخزنة… وهتعرفوا الحقيقة.”
سألها الرائد:
“الخزنة فين؟”
ردت:
“في مكتب الحاجة سعاد… بس الغريب إننا دورنا عليها النهارده.”
“ولقيتوها؟”
هزت رأسها بالنفي.
“الخزنة نفسها… اختفت.”
ساد الصمت.
حد سبقهم مرة تانية.
وكل خطوة كانوا بيقربوا فيها من الحقيقة…
كان شخص مجهول بيسبقهم بخطوة.
وفي آخر الليل…
كانت ليلى قاعدة في الحجز، بتحاول تسترجع كل اللي حصل يوم كتب الكتاب.
وفجأة افتكرت حاجة.
مش كلمة…
ولا وش…
لكن صوت.
