كان صوت سامح.
أبويا وقف ورا الباب، وشده الغضب من جديد: “امشي يا جدع أنت من هنا! أنت فاكر بنات الناس لعبة في إيدك؟! ترميها الصبح وتيجي تخبط على بابنا الظهر؟! امشي بدل ما أطلبلك البوليس وألم عليك الشارع كله!”
— “افتح يا عمي والله العظيم أنا اتظلمت وظلمت! افتح واعمل فيا اللي أنت عايزه.. اضربني، اموتني، بس افتح اسمعني!”
أنا خرجت من الأوضة ووقفت ورا أبويا. بصيت للباب المقفول.. قلبي كان بيدق بسرعة، بس المرة دي مكنش فيه خوف.. كان فيه وجع وكبرياء مكسور.
بصيت لأبويا وقلتله بصوت ثابت لأول مرة من الصبح:
— “افتحله يا بابا.. افتحله عشان يسمع كلمتين كان لازم يسمعهم من الصبح.”
أبويا بصلي بتردد، وبعدين حرك الكالون وفتح الباب.
سامح كان واقف على العتبة.. منظره كان يوجع القلب لو مكنتش موجوعة منه أكتر. قميصه متنعكش، شعره واقف، وعيونه حمرا زي الدم من العياط.
أول ما الباب اتفتح، سامح ما استناش.. نزل على ركبه قدام أبويا على عتبة الشقة، قدام جيران العمارة اللي بدأوا يفتحوا أبوابهم يستكشفوا الصوت!
— “حقك عليا يا عمي..” سامح قالها وهو بيحاول يمسك إيد أبويا، بس أبويا سحب إيده لورا بقسوة.
— “قوم يا سامح.. الراجل ما ينزلش على ركبه بالطريقة دي، خصوصًا لما يكون بايع!” أبويا قالها بصوت زي الصخر.
سامح رفع رأسه، وبصلي أنا.. بص في عينيا اللي كانت مليانة قسوة ووجع.
— “مريم.. أنا عرفت كل حاجة. أمي هي اللي…”
قطعت كلامه بصوت حاد هز الصالة كلها:
— “أمتك مش هي اللي رمتني في الشارع يا سامح! أمك ما جتش معايا العربية وما زقتنيش قدام العمارة وما قالتش لأبويا بنتك أهي ورقتها هتجيلها! أنت اللي عملت كده! أنت اللي صدقت، وأنت اللي هُنت عليك، وأنت اللي اخترت تذبحني يوم صباحيتي عشان ترضي كبرياءك!”
سامح قام وقف بالعافية، وقرب خطوة ناحيتي، بس أنا رجعت خطوة لورا:
— “مريم والله العظيم الشيطان عماني.. نخوتي وغيرتي موتوني! أنا لما شفت الرسمة حسيت إن الدنيا اتضلمت في وشي، ما فكرتش، ما سمعتش.. أنا جزمة، أنا غبي، اضربيني واعملي فيا اللي أنتِ عايزاه بس ما تسيبينيش!”
— “أسيبك؟!” ضحكت ضحكة مكسورة مليانة مرارة. “أنا خلاص سبتك يا سامح.. أنت فاكر إن الموضوع حنة ورسمة؟ الموضوع إنك في أول اختبار ليا معاك، حطيتني تحت رجليك عشان تشكك فيا. أنت ما حميتنيش.. أنت كنت أول واحد يرميني للناس!”
— “والله العظيم هاخدلك حقك من الدنيا كلها!” سامح صرخ وهو بيمسك في إيد أبويا تاني: “يا عمي أنا مستعد أعمل أي حاجة أنت تطلبها.. مستعد أعتذر قدام الشارع كله، مستعد أكتبلها الشقة باسمها، مستعد أقطع علاقتي بأمي لو هي السبب في خراب بيتي! بس ما تحرمونيش منها!”
أبويا بص لسامح بنظرة تقيلة، وبعدين بصلي: “الرأي رأي بنتي يا سامح.. البنت اللي أنت هنتها وعجنت كرامتها في التراب يوم صباحيتها، هي الوحيدة اللي ليها حق التقظير.”
سامح بصلت بعيون مليانة ترجي، دموعه كانت نازلة على خده بجد، ولأول مرة أشوف الراجل القوي الشديد ده مكسور بالطريقة دي.
— “مريم.. عشان خاطر الحب اللي كان بينا.. إديني فرصة واحدة أصلح اللي انكسر.”
وقفت قدامه، وبصيت في عينيه بثبات. كل لحظة وجع عشتها الصبح مرّت قدام عيني.. شكل شنطتي وهي مرمية على الأرض، نظرة البقال، وكسرة أبويا وهو بيسمع كلامه.
— “اللي انكسر يا سامح..” قلتها بصوت هادي جداً بس أشد من الس*كينة: “ممكن يتصلح.. بس مش بالسهولة دي. أنت فاكر إن أمتك لما ضحكت عليك، تروح تطلقني وترجع تعتذر فخلصت؟ لأ.. أمك لازم تحضر هنا، قدام أبويا وأمي، وتعتذر على اللي عملته. وأنت.. أنت لازم تثبتلي إنك راجل بتعرف تحمي مراتك حتى من نفسك ومن غضبك. وحتى لو عملت كده.. أنا مش راجعة معاك الشقة دي النهاردة، ولا بكرة.”
سامح اتصدم: “يعني إيه يا مريم؟!”
— “يعني هتسيبني هنا في بيت أبويا.. لحد ما أعرف إذا كنت أقدر أثق فيك تاني كراجل وأب لعيالي في المستقبل، ولا أنت مجرد راجل يمشيه غضبه وأمه!”
**الجزء الثالث**
خرج سامح من بيت أبويا ورجليه مش شايلاني. الباب اتأفل وراه، والصوت رن في العمارة كلها زي الس/كينة. كان حاسس إن الدنيا كلها اسودت في وش، بس في نفس الوقت كان جوا شعلة غضب ونار بتاكل في صدره.. المرة دي مش ناحيتي، المرة دي ناحية الشخص اللي استغفل نخوته وضحك عليه، ناحية أمه!
في الصالة عندي، أبويا قعد على الكرسي وهو بيتنهد بنفاذ صبر، وبصلي ونظرة التقدير في عينه كانت باينة:
— “تربيتي يا مريم.. الراجل اللي ما يحسبهاش بعقله من أول قلم، لازم يتربى، والبيت اللي يتهد بكلمة في لحظة طيش لازم يتثبت ساسه الأول قبل ما تفكري ترجعيله.. بس قوليلي، أنتِ فعلاً ناوية تسامحيه لو أمه جرت واعتذرت؟”
بصيت للأرض ودمعة سريعة نزلت من عيني مسحتها بظهر إيدي:
— “أنا مش فارق معايا اعتذار أمه يا بابا.. أم أمه خلاص كشفت وشها وعرفت إنها عدوتي. أنا اللي فارق معايا سامح.. عاوزة أعرف هل هو راجل ليه كلمة ويقدر يحميني، ولا مجرد لعبة في إيد أمه ورغباتها؟ لو ما وقفش وقفة رجالة قدام أمه وعلمها حدودها، يبقى الرجوع ليه انتحار.”
أم دخلت عليا وحضنتني، وكانت بتدعي من قلبها إن ربنا يكتبلي الخير ويهدي السر.
في نفس الوقت، سامح كان وصل تحت بيت أمه. نزل من العربية وراخزع الباب بقوة كادت تكسره. طلع السلم بخطوات زي الرعد، وفتح باب شقة أمه ودخل.
كانت “حاجة هدى” قاعد في الصالة، وحاطة رجل على رجل وبتمصمص شفايفها وهي بتتكلم في التليفون مع “نوران” بنت أختها:
— “أيوة يا نوران يا حبيبتي.. خلاص البت راحت بيت أبوها بشنطة هدومها، وسامح قفل الصفحة دي خالص.. تجهزي أنتِ بس عشان…”
ما كملتش الجملة، لأن سامح هجم على التليفون وسحبه من إيدها ورماه على الأرض اتدشش ميت حتة!
أمه اتنفضت من مكانها ومسك قلبه:
— “اسم الله عليك يا بني!! جرى لك إيه؟! أنت اتجننت ولا إيه يا سامح؟! تكسر التليفون في وشي؟!”
سامح كان واقف قدامها، جسمه كله بيرتجف، وعيونه دم من كثرة العياط والغضب، وصوته خرج زئير هز أركان البيت:
— “أنتِ اللي جننتيني!! أنتِ اللي خرّبتي بيتي في أول ليلة! بتتتفقي مع بنت أختك على خراب بيت ابنك الوحيد؟! بتستغلي غيرتي ونخوتي عشان ترمي مريم في الشارع؟! أنتِ إيه؟! أنتِ أم ولا إيه بالظبط؟!”
أمه تحول وشها لقسوة شديدة، وحطت إيدها في وسطها:
— “أنا أمك! اللي ربتك وكبرتك وجوزتك! البت دي مكانتش تنفعك، بت بندر شايفه نفسها، وما بتفهمش في الأصول! أنا عملت كده عشان أصلحلك عيشتك قبل ما تدبس فيها وعيالك يطلعوا…”
— “ما تنطقيش اسم عيالي على لسانك!!” سامح صرخ وهو بيشاور بإصبعه في وشها لأول مرة في حياته. “مريم أشرف وأطهر منك ومن بنت أختك! مريم سلمتك دماغها عشان خايفة تزعلك، وأنتِ استغليتي طيبتها ووسختي سمعتها قدامي! أنتِ خلتيني أقف قدام الناس أترما تحت رجلين أبوها وأرجوها تسامحني! خلتيني أصغر راجل في الدنيا يوم صباحيتي!”
أمه اتصدمت لما سمعت كلامه، ووعيها اتهز:
— “أنت.. أنت رحتلها بيت أبوها؟! وبتترجاها كمان؟! يا خيبة رجولتك يا سامح! بقى ابن الحاج متولي ينزل على ركبه لبت عشان سابت البيت؟!”
— “نزلت عشان أنا اللي ظلمت!” سامح قالها وهو بيمسح دموعه بقسوة. “أنا نزل رجولتي في التراب لما صدقتك وشكيت في مراتي الشريفة! بس وحياة ربنا يا أمي.. وحياة كل نقطة دم تجري في عروقي، اللعبة دي مش هتعدي بالساهل!”
— “هتعمل إيه يعني؟!” أمه قالتها بتحدي وكبرياء: “هتضرب أمك عشان بت؟!”
— “لأ.. مش هضربك، لأن ربنا أمرني بالوالدين إحساناً، بس أنتِ هتجيبي بعضك معايا دلوقتي، وهتمشي قدامي زي الشاطرة لبيت عمي أبو مريم.. وهتعتذري قدام أبوها وأمها، وهتقولي الحقيقة كلها وتطهري سمعة مريم اللي أنتِ وسختيها!”
أمه ضحكت بتهكم ورفعت رأسها:
