غمضت عيني وسندت ظهري، بحاول أهدي ضربات قلبي، بس جسمي كان بيرتعش غصب عني.
كنت ندمانة.. ندمانة إني موقفتش للجوازة دي بالمرصاد من الأول.
بنتي مريم ومدحت كانوا زمايل في جامعة طنطا.
يوم التخرج، كنت أتمنى يقعدوا هنا في المدينة ويشقوا طريقهم. أنا معنديش غير ولد وبنت، وجوزي مات من بدري وشقيت عليهم لوحدي لحد ما كبروا.
أحمد شقي وحركي زي القرد، ومريم هادية وطيبة زي النسمة.
مكنتش عايزة أبعدها عن حضني.. كنت خايفة مأقدرش أحميها لو جرى لها حاجة.
بس مدحت كان متمسك وقال إن بلدهم في الصعيد فيها مشاريع ومستقبل، وإن أهله طفحوا الدم عشان يعلموه ولازم يرجع يرد لهم الجميل.
أنا رفضت رفض قاطع.. بس بنتي قلبها خفيف وطيب.
ولأول مرة في حياتها تعصاني، ووافقت وكتببوا الكتاب
من غير فرح.. ومن غير شبكة تليق بيها.
أحمد وقتها قالي يا أمي مدحت ده بيلعب بأختي وبيرسم عليها، بس مريم ضحكت وقالت أهله على قد حالهم يا ماما، بلاش نبقى ماديين.
بنتي مكنتش تعرف الدنيا فيها إيه ولا قلوب البشر مخبية إيه.
جواز البنت بعيد عن أهلها بيبقى قمار.. رهان على ضمير الراجل اللي معاها.
ومدحت ده… هل عنده ضمير أصلاً؟
طول السنة اللي فاتت، حاولت أروح
أزورها كذا مرة، وكل مرة يطلعوا بحجة تمنعني.
ومريم كانت دايماً بتبين إنها أسعد واحدة في الدنيا.
دلوقتي بس فهمت.. كل ده كان تمثيلية متفبركة ومحبوكة صح.
أنا بجد هأكل نفسي من الندم إني مفهمتش بدري.
فجأة.. العربية فرملت جامد.
أحمد قال في حاجة غلط يا أمي.
بصيت قدامي، لقيت الطريق واقف تماماً وفي تحويلات وأعمال صيانة للطريق السريع.
أحمد قال تفتكري نلف وناخد الطريق الصحراوي التاني؟
فتحت الخريطة على الموبايل.. لو لفينا هنزود أكتر من 60 كيلومتر.
أنا مكنش عندي وقت أضيعه.
بس السكة قدامنا مقفولة فعلاً ومفيش مجال نعدي.
قعدت أدقق في الخريطة ثواني، وشاورت بصبعي على مدق صغير
خش من السكة دي.
أحمد بصلي بذهول يا أمي ده مدق ضيق وكسر! عربيتين ميعرفوش يعدوا من جنب بعض فيه.. وإحنا بقينا نص الليل، عايزانا نمشي فيه؟!
امشي فيه وأنت ساكت، قولتهاله بلهجة حاسمة.
الحتة الضيقة دي متكملش كيلومتر واحد، أول ما نعديها هنرجع لخط الأسفلت السريع تاني.
بص في عيني طول أوي، ووشه قلب وبقى سيريس جداً
أمي… هو في حاجة حصلت ل مريم؟
فكرت شوية وهزيت رأسي غالباً اه.
أول ما سمع الكلمة، عروقه نفرت ودمه فار
ابن مدحت ده، صح؟ أنا من أول يوم شوفت خلقته وأنا مش طايقه.. وربنا ل أروح أفرتكوا!
الغل والشياطين كانت بتنط من عينه.
أحمد من صغره وهو متعلق باخته جدا .. يوم ما اتجوزت، قفل على نفسه الأوضة يوم كامل
شفت منظره وهو قايد نار، قمت مخبطاه بالراحة على دماغه
شغل مخك ده.. بلاش غشومية.. فرتك مين وبتاع مين؟ أنت فاكر نفسك في عصر الفتوات؟ ركز في السواقة وبس
العربية طارت وسط الضلمة، وبعد وقت مش كتير، رجعنا تاني على الطريق السريع.
طلعت الموبايل وقعدت أعيد الفيديو كول بتاع العصر تاني وتاني.
من أول ثانية في المكالمة وأنا حاسة بإن في حاجة مش طبيعية.. الكاميرا كانت مرفوعة لفوق زيادة عن اللزوم، ومبينة بس من أول بطنها وطالع.
إحساس الأم كان بيقولي إن مدحت بيخبي حاجة تحت كادر الكاميرا.
عشان كدة أنا سجلت الشاشة فيديو وأنا بكلمها.
أحمد قرب مني وبص على الشاشة
يا ماما، هي مريم مالها طالعة ميبسة كدة زي بتوع الذكاء الاصطناعي AI؟
حواجبة اتقفلت تفتكري تكون عاملة فينا مقلب ومغيرة وشها بالبرامج عشان تضحك معانا؟
بصيت له بطرف عيني أختك وش المقالب دي؟
وماله، جايز.. أول امبارح وامبارح مكنتيش عارفة توصلي لها، وأنتِ قولتي لها بهزار لو مظهرتيش هبلغ الشرطة.. يمكن خافت تقلقي فعملت كدة.
وطلع موبايله وفتح أبلكيشن، وفي ثواني غير وشه وصوته تماماً.. لدرجة تخليك تشك في عينك.
سألته يعني أنت شايف إن اللي في الفيديو دي مش أختك؟
مسك الموبايل ودقق أوي
مش قادر أحكم.. بس بصي يا أمي.. ملامح وشها وتعبيراتها ثابتة مبتتحركش تقريباً، وإيد جوزها ثابتة في نفس المكان مابتتهزش.. ده شغل AI واضح أوي.
طب لو ال AI والبني آدم الحقيقي بقوا شبه بعض بالمنظر ده… هنفرق بينهم إزاي؟
سهلة يا ماما.. ال AI ميعرفش الأسرار والحاجات الخاصة اللي بينكم.. يعني لو سألتيه على حاجة سر، وجاوب صح، يبقى بني آدم حقيقي.
في اللحظة دي.. عقلي وقف تماماً.
رأس البر…
مسكت الموبايل وضغطت عليه بكل عزمي وعيني بتطلع شرار
رأس البر دي.. هي الشفرة االي في الفيديو بنتي ..بنتي في مصيبه !!!!!!!
……….
أحمد داس بنزين على آخره، وصوت الموتور بقى يزعق في جوف الضلمة والصحراء حوالينا زي الوحش الجعان. ملامح وشه اتقبضت، وعروق إيديه اللي كبست على الدريكسيون اتصلبت وبقت شبه الحبال شفرة إيه يا أمي؟ رأس البر مالها؟ ما تفهميني في إيه!
دموعي اللي كنت حابساها
طول السكة فرت من عيني، وصوتي طلع حشرجة مكتومة مليانة قهر أختك عمرها ما حبت رأس البر يا أحمد.. مريم وهي عندها سبع سنين، كانت هتيجي تحت العجلة في سوق رأس البر، ومن يومها جالها فوبيا من اسمها.. لما كانت تسمع السيرة دي بس، جسمها كان بيتنفض وتعيط وتستخبى بنتي لو واعية وفي كامل إرادتها، مستحيل تقولي روحي رأس البر، مستحيل!
أحمد عينه لفت في الشارع وضغط على السنان بقوة خلت فكه يطق يعني اللي كلمتنا دي…
دي مريم.. بس مريم اللي كانت بتموت وبتستنجد بيا باللي باقي من روحها! لويت إيدي وأنا بفتكر تفاصيل وشها في الكاميرا الكلب ده كان حاطط السكينة في جنبها تحت الكادر.. عشان كده إيده مكنتش بتفارق وسطها، وعشان كده هي كانت ميبسة ومرعوبة، ونطقت بأول اسم هي عارفاها وموجوعة منه عشان تفوقني! مريم في خطر يا أحمد.. جوزها حابسها أو عامل فيها حاجة!
أحمد ضرب الدريكسيون بإيده التانية زئير قوي هز صاج العربية والنعمة الشريفة ما هسيبه.. ده أنا هطير رقبته!
الساعات بدأت تمر وكأنها سنين، عداد السرعة متبت على 160، والأسفلت بيموت تحت الكاوتش، والضلمة بدأت تفتح على نور الفجر الخافت اللي رامي بياضه على جبال قنا الصخرية. مكنتش شايفة المناظر، كنت شايفة بنتي وهي بتنزف، وهي بتصرخ من غير صوت، وهي بتدعي يارب أمي تفهمني.
وصلنا المدق الجبلي المؤدي للقرية والشمس كانت بدأت تطلع وتكشف البيوت الطوب الأحمر المتطرفة وسط الزرع والبوص. أحمد هدى السرعة وبدأ يدخل بالعربية في وسط الشوارع الضيقة والتراب بيعفر وراها. وقفنا على بعد بيت واحد من بيت مدحت، النور كان مطفي والهدوء غريب، كأن البيت مهجور.
نزلت من العربية قبل ما تقف تماماً، رجلي شيلاني بقوة
مش قوتي، وورايا أحمد خطوته بتهد الأرض وشايل الشنطة اللي فيها البطة في إيده. طلعت عتبة البيت، وخبطت على الباب الحديد بكل عزمي، خبطات ورا بعض ورا بعض عملت دوشة في الشارع كله.
مفيش خمس ثواني، والباب اتفتح موارب، وظهر وش مدحت.. كان لابس جلابية، وشه أصفر ومخطوف، وعينه حمرا وفيها غدر وخوف حماتي؟! أحمد؟! إيه اللي جابكم في وقت زي ده ومن غير ميعاد؟!
زقيته بكتفي بكل غلي وجبروتي ودخلت الصالة فين مريم يا مدحت؟!
مدحت اتلخبط ورجع لورا، وبيحاول يداري الباب اللي وراه مريم.. مريم نايمة جوه يا حجة، تعبانة و…
أحمد مسبلوش فرصة يكمل، رمى الشنطة في الأرض، وقفش في جلابيته من عند رقبتها ورفعه لفوق لحد ما رجله اتعوجت عن الأرض، وزعق في وشه بصوت رعد أختي فين يا روح أمك؟! قسماً بالله لو ما نطقت دلوقتي لأكون دافنك مكانك!
يا جماعة وحدوا الله.. مريم تعبانة والله وفي الأوضة! مدحت صرخ وصوته اتهز وهو بيبص لأحمد برعب.
سيبتهم وجريت على الأوضة الجوانية، زقيت الباب برجلي.. الأوضة كانت ضلمة، وريحة كتمة وغم ودموع مغرقة المكان. نورت النور، وعيني جت على السرير..
مريم كانت ملقوحة على السرير، وشها أزرق وفي علامات صوابع معلمة على رقبتها، وإيديها ورجليها مربوطين بحبال غسيل جامدة في حديد السرير، وبقها متكمم بحتة قماش بدمها.. وعينها مبرقة، وأول ما شافتني، الدموع نزلت شلالات وبدأت تصرخ من ورا القماشة صرخات مكتومة تقطع القلب.
صرخت بأعلى صوتي وهجمت عليها مريم!!! يا قلب أمك!
أحمد سمع صرختي، وجر مدحت من رقبتها ورماه جوه الأوضة على الأرض زي الشوال، وأول ما شاف منظر أخته، وشه قلب ودمه هرب منه، وبقى مفيش في عينه غير الموت. مسكت مسن الحديد من
الشنطة وبدأت أقطع في الحبال وأنا بصرخ فك أختك يا أحمد!! فك أختك!
