صفاء من ثقتها في نفسها قالت وهي بتعيط: “فتشني يا خالد.. فتشني عشان تعرف إني مظلومة.”
خالد جوزي بص لي بقلة حيلة وبص لصفاء، وقرب منها بثقل وحط إيده في جيب جلابيتها.. وطلّع العلبة الصغنونة! علبة دواء فاضية بتاعة مادة حساسة وممنوعة للأطفال وممكن تسبب تسمم فوراً!
البيت كله شهق. حماتي صرخت ولطمت على وشها: “يا لهوي يا صفاء! بقى هي دي أصلك؟ عايزة تقتلي عيال جوزك عشان الولد؟!”
صفاء وشه أصفر زي الورقة، بصت للعلبة وبصت لإيد خالد وقالت بصوت مكسور ومش مصدقة: “والله العظيم ما بتاعتي! والله ما شفتها قبل كده! صدقني يا خالد.. أنا أعمل كده في عيالك؟!”
خالد كان واقف مشدود، عينيه فيها كمية صدمة ووجع لا ينوصفوا. بص لصفاء بنظرة عمري ما شفتها في عينيه، نظرة واحد حاسس إن السكينة جت له من أكتر حد بيحبه وبيثق فيه. ما نطقش ولا كلمة، مسك العلبة ورمى الببرونات على الأرض اتكسرت، وأخد الولدين في حضنه وهو بيترعش.
حماتي مسكت صفاء من كتافها وطردتها برة الصالة: “امشي من هنا! غوري على أوضتك بدل ما أطلب لك الشرطة فوراً! طلعتِ ثعبان ومستخبي في بيتنا!”
صفاء دخلت أوضتها وهي بتعيط بحرقة وصوت بكاها كان مسمع البيت كله. أنا ساعتها حست بإنجاز ونصر مش طبيعي.. الخطوة الأولى نجحت بحرفية، والكرة بقت في ملعبي تماماً.
مرت أيام، والبيت كان عبارة عن مأتم. خالد كان ساكت تماماً، ما بيكلمش حد، ولا حتى بيبص في وش صفاء لما تصادف وتعدي. صفاء حاولت تتكلم معاه مية مرة، تبكي وتستحلفه ببنتاها إنه يصدقها، بس هو كان يقفل الباب في وشها ويقعد بالساعات ساكت. أمه كانت كل يوم تزن على دماغه:
“طلقها يا خالد! الست دي كانت هتضيع عيالك! دي قلادة شؤم وغيرة عمياها!”
بعد أسبوعين من النكد والضغط المستمر مني ومن أمه، خالد نادى على صفاء وقعدها في الصالة. أنا قعدت جنب حماتي وممثلة الخوف والكسرة.
خالد بص لصفاء وقال بنبرة ميتة: “أنا عمري ما فكرت إن الوجع يجيني منك أنتِ بالذات يا صفاء.. بناتي هيعيشوا معايا، وأنتِ يا صفاء… طالق.”
صفاء ما صرختش.. مسحت دموعها بمنتهى الهدوء، وبصت لخالد نظرة طويلة أوي، نظرة وجع وسامح، وقالت له بصوت واطي بس يرعب: “أنا ماشية يا خالد عشان بحبك ومش هقف في طريق سعادتك مع عيالك.. بس افتكر كويس إن الظلم ظلمات، وربنا مش بيسيب حق مظلوم.. وحقي عند ربنا قريب أوي.”
أخدت شنطة هدومها ومشيت، وسابت بناتها الثلاثة في البيت بعد ما اتفقوا إنهم يفضلوا مع أباهم عشان مدارسهم وميتشتتوش.
ساعتها أنا حسيت إن الدنيا ضحكت لي خلاص! الست اللي كانت مشاركاني في جوزي غارت، والبيت بقى بتاعي، وأنا أم الولاد والست الوحيدة في حياة خالد.
بس يا فرحة ما تمت…
من تاني يوم طلاق صفاء، خالد اتغير تماماً.. بس مش التغيير اللي أنا كنت حاطاه في بالي!
خالد ما بقاش يبتسم، بقاش يقعد معايا، كان يرجع من شغله يدخل أوضة بناته يقعد معاهم، يذاكر لهم ويحضنهم ويشيل عيالي الصغيرين برود غريب، كأنه بيأدي واجب وبس. معاملته معايا بقت جافة وزي الغريب، حتى حماتي لما كانت تحاول تفتخ معاه سيرة جواز أو فراشة البيت، كان يزعق ويمشي.
مرت ست شهور،
وأنا حاسة إني اتجوزت خيال مآتة. كل ما أحاول أقرب منه، يتهرب. كل ما ألبس ولا أتدلع، يبص لي بنظرة فاضية ويقولي: “أنا تعبان وعايز أنام.”
وفي يوم، الولدين عيوا فجأة وسخنوا جداً. الحرارة وصلت 40، وأنا اتجلبت وبقيت أصرخ ومش عارفة أعمل إيه. خالد مكانش في البيت، وحماتي كانت عند أختها.
طلبت الدكتورة تجيلي البيت بسرعة لأن العيال كانوا بيفرفروا. الدكتورة جت وفحصت الولاد، وأدتهم حقنة حرارة، وقعدت جنبي تطمنهم.
وهي بتكتب الروشتة، بصت لي وقالتلي: “يا مدام زهرة، التعب ده عادي نزلات برد، بس خلي بالك قوي من الأدوية اللي في البيت.. الأطفال في السن ده أي جرعة غلط من أدوية الكبار ممكن تسبب لهم شلل أو وفاة فوراً، زي الدواء اللي لقيتيه في السبوع ده.. فاكراه؟”
أنا اتلخبطت لانها كانت صاحبة صفاء و كانت بتتكلم بشك وقلت لها بارتباك: “اه اه.. فاكراه، ربنا ستر.”
الدكتورة بصت لي باتهام وقالت: “بس الغريبة يا زهرة، الدواء ده أصلاً ناقص من السوق بقاله سنة وما بينزلش غير بروشتة خاصة جداً ومن مستشفيات معينة خاصه بالاورام.. صفاء جابته منين ساعتها عشان ؟”
أنا اتسمرت في مكاني..ووشي اتخطف .
في اللحظة دي بالذات، الباب اتفتح وخالد كان واقف على الباب! سمع جملة الدكتورة الأخيرة كلها!
خالد دخل بخطوات بطيئة جداً، وشه كان اسود زي الليل. مشى الدكتورة ووقف قدامي بعد ما قفل الباب.
البيت كان ساكت سكون يرعب.. عيالي كانوا نايمين من أثر الحقنة.
