نادية كملت وراه بدموع مفضوحة: أيوة يا باشا، دي ست مش مهتمية بضناها! ولاد أخويا كانوا محتاجين رعاية لولا إني دخلت الشقة الصبح اطمنت عليهم! دي مش أم مثالية، ومعانا الأوراق اللي بتثبت تنازلها المؤقت!.
بصيت لنادية، وقربت منها خطوة واحدة، كانت عينيا فيها نظرة خلتها ترجع لورا بخوف حقيقي. بصتلها وقولت بهدوء مرعب: الورق ده… اتعمل إمتى يا نادية؟. نادية ارتبكت وبلعت ريقها: أ… إنتِ اللي سبتي البيت بمزاجك!. سيبت البيت بمزاجي؟ ضحكت ضحكة مكسورة عالية هزت أركان المكتب: أنا أسيب عيالي اللي مكملوش شهور برضايا؟ طب الأوراق دي عليها تاريخ إيه يا باشا؟.
أستاذ مجدي دخل في اللحظة دي مع أبويا، وقال باحترام: سيادة المسؤول، أنا وكيل الشاكية، وبنطعن بصحة هذه الأوراق وبنطلاعب بالتحفظ على كاميرات المراقبة الخاصة بالشارع، لأن موكلتي انطردت الساعة تلاتة صباحًا بإسدال جارتها، وما دخلتش الشقة من وقتها! التغييرات اللي حصلت دي تمت بمعرفتهم عشان يلفقوا الموقف!.
المسؤول بص لأحمد وشك بدأ يظهر في عينيه، مسك الورقة المزعومة وبص فيها، وبعدين بص لأحمد: الكلام ده حقيقي يا أستاذ؟ في كاميرات في الشارع؟.
أحمد وشه بهت للحظة، بس سرعان ما استرجع بروده ورد: شارع إيه وكاميرات إيه يا فندم؟ الشارع هناك هادي ومفيش كاميرات واضحة.. وهي بتماطل عشان تتهرب من المسؤولية، وعيالي هيكونوا في رعاية أختي بالأوراق المتاحة!.
الأوراق دي غير كافية قانونًا ولا تمنح الحق في الفصل التعسفي للصغار عن أمهم.. أستاذ مجدي رد بحزم وقوة: الأم ليها الحق المطلق في حضانة الصغار في سن الرضاعة الطبيعية، وفصلهم عن الأم يمثل إضرارًا بالغًا بمصلحتهم! وإحنا بنقدم دلوقتي طلب رسمي عاجل لاسترداد الأطفال فورًا ونقلهم لمكان آمن لضمان رعايتهم!.
المسؤول مسك القلم وفضل يدق بيه على المكتب بتفكير. الجو في الأوضة كان مشحون بدرجة كبيرة. بص لأحمد وبصلي، وقال بصوت حاسم: الأطفال فين دلوقتي يا أستاذ أحمد؟.
أحمد اتلجلج، وبص لنادية بنظرة سريعة مليانة توتر، وبعدين رد: الولاد… الولاد في البيت مع والدتي، نايمين وبخير ومحدش يقدر يمنعنا!.
في اللحظة دي، تليفون نادية اللي كان محطوط على الترابيزة قدامها نور، وبدأ يرن. نادية مدت إيدها بسرعة علشان تاخده، بس المسؤول لمح الشاشة وقرا الاسم بصوت عالي: مركز الرعاية الطبية للأطفال – مستشفى النيل التخصصي؟!
نادية اتخضت وإيدها اتجمدت في الهوا. أنا أول ما سمعت اسم المستشفى، عقلي طار. نسيت إني في القسم، ونسيت كل حاجة، وهجمت على الترابيزة خطفت التليفون وفتحت الاسبيكر قبل ما أحمد يلحق يشدني.
وصوت الطبيب طلع من السماعة عالي وواضح، بيرن في الأوضة زي الرصاص:
ألو… مدام نادية؟ الطفلين التوأم اللي وصلوا لحضانتكم من الجيران أو بمعرفة العائلة حالتهم الصحية متبدلة بسبب البكاء المستمر والرفض التام للرضاعة نتيجة التوتر وغياب الأم، والصغار يمرون بحالة إجهاد وجفاف شديدين بسبب عدم تناول الطعام وبكائهم لعدم قدرتهم على التكيف! إحنا محتاجين الأم فورًا لمتابعة الإجراءات الطبية اللازمة واستقرار حالتهم النفسية والغذائية، وإحنا بنثبت الحالة رسميًا… لازم توجدوا حالًا في المستشفى!.
نزلت على دماغي زي صاعقة الدنيا لفت بيا، والأوضة كلها اتهزت. حسيت برجلي مش شيلاني، قعدت على الأرض بصرخة شقت سقف القسم كله:
«ولادي! هما اللي وصلوهم لكده من كتر الخوف والعياط من غير أكل!».
أحمد وشه اتقلب أزرق، ونادية رجليها خبطت في بعضها ووقعت على الكرسي وإيديها بترتعش بهستيريا، وشفايفها بتتحرك من غير صوت. الظابط قام وقف فجأة من ورا مكتبه، وشه كان بيبرق من الغضب والحزم، شاور للعسكري اللي واقف على الباب وزعق بصوت جهوري:
«اقفل الباب ده وما تخرّجش حد منهم برة! وهاتلي قوة فورًا وعربية بوكس تحت!».
بص لأحمد ونادية وقال بنبرة حازمة: «بقى الولاد نايمين مع والدتك في البيت وزي الفل؟! وبتتحايلوا على القانون وبتزوروا تنازل، والعيال متبهدلة في المستشفى بسبب إهمالكم وطردكم لأمهم؟!».
أحمد حاول يتكلم ويتلجلج: «يا باشا والله ما نعرفش حاجة… نادية هي اللي نزلت بيهم الصبح، أنا ما كنتش أعرف إنهم تعبانين… هي اللي قالتلي هنوديهم للدكتور عشان كحة!».
نادية صرخت فيه لما لقت أخوها بيبيعه في ثانية عشان ينجد رقبته: «أنا يا أحمد؟! مش أنت اللي قولتلي دبر أي دبرة وخليهم يسكتوا عشان صوتهم ما يفضّحناش في العمارة ويقولوا رامي مراته وحابس عياله؟! مش أنت اللي جبت من الصيدلية دوا وقولتلي حطيه عشان يناموا شوية لحد ما نخلص المحضر؟! بتلبسني أنا المصيبة لوحدي؟!».
أبويا في اللحظة دي مسك في أحمد، الراجل العجوز اللي في الثمانينات بقى فيه عزم يهد جبال من حرقة قلبه على أحفاده، والظابط والعساكر فضلوا يسلكوهم بالعافية.
الظابط زعق: «كفاية! أمين شرطة، خد المتهم والمتهمة دول في الحجز فورًا، وتحريز الموبايل ده بكل المكالمات اللي عليه! وأنتِ يا مدام، اطلعي مع المحامي بتاعك ومعاكم القوة على مستشفى النيل حالًا، وأنا هلحقكم بمندوب من النيابة العامة لإثبات الحالة وفتح تحقيق في الإهمال الجسيم والنزاع على الصغار وتزوير الأوراق!».
خرجت من القسم وأنا مش شايفة قدامي، خطواتي كانت بتتسابق مع الهوا، الدموع نشفت في عيني وحل مكانها رعب حقيقي ما يدوقوش غير اللي شال ضناه بين إيديه. ركبنا عربية مع أستاذ مجدي وأبويا، وكل ثانية في الإشارات كانت بتمر كأنها قرن كامل.
وصلنا مستشفى النيل التخصصي، دخلت الطوارئ وأنا بنهج وأصرخ باسم يوسف ويونس.
ممرضة الاستقبال جريت عليا: «أنتِ والدتهم؟». «أيوة أنا أمهم! فين ولادي؟! عايشين صح؟! قوليلي إنهم بخير بالله عليكي!».
