“معروف عنهم إيه؟ عندك دليل واحد على الكلام اللي قولتيه؟ ولا مجرد اتهامات ؟”
حماتي حاولت ترد، لكنه مكملش ليها فرصة.
“الست دي داخلة بيتنا شايلة خير لبنتها، وإنتِ استقبلتيها قدام الجيران. لو حد عمل كده مع أمك، كنتِ هتسميه إيه؟”
سكتت…
لأول مرة ملقتش رد.
كمل أحمد:
“أنا غلطت لما سكت. وغلطت أكتر لما دافعت عنك. لكن من النهارده، أي حد يهين مراتي أو أم مراتى، حتى لو كنتِ إنتِ… هقف قدامه.”
حماتي اتعصبت وقالت:
“يعني هتقف ضدي علشان مراتك؟”
رد أحمد من غير تردد:
“هقف مع الحق… حتى لو كان ضد أقرب الناس ليا.”
أنا كنت واقفة بسمع، ودموعي نازلة من غير ما أحس.
مكنتش دموع فرحة… كانت دموع قهر بيتغسل.
وفجأة، لقيت باب الشقة بيخبط.
فتحت…
لقيت أمي واقفة برا.
كانت جاية تديني علبة أكل كانت نسيتها عندي.
أول ما أحمد شافها، نزل بوشه في الأرض، وقرب منها وقال:
“سامحيني يا خالتي… أنا قصرت في حقك.”
أمي ابتسمت ابتسامتها الهادية وقالت:
“يا ابني… المسامح كريم.”
لكن أحمد هز راسه وقال:
“لا… الاعتذار لوحده مش كفاية.”
وبص ناحية أمه وقال:
“الحق لازم يرجع لأصحابه.”
ساعتها، حماتي فهمت إن الأيام اللي كانت بتتحكم فيها في الكل… خلاص انتهت، وإن احترام الناس مش بيتاخد بالصوت العالي، لكن بالأخلاق.
يتبع…
بقلم ندى الجمل
حماتي بصت لأحمد بصدمة، وبعدها ضحكت ضحكة كلها سخرية وقالت:
“يعني مراتك لعبت في دماغك؟ بقى أنا أمك، وتيجي النهارده تقف ضدي؟”
قال أحمد بهدوء: “محدش لعب في دماغي… أنا شفت الحق متأخر.”
ردت بعصبية: “الحق؟! الحق إن مراتك وأمها دخلوا بيني وبين ابني. من يوم ما اتجوزتها وأنا مش شايفة منك غير العقوق.”
سكت أحمد، لكن المرة دي كان سكوته مختلف.
أما أنا، فقولت: “أنا عمري ما طلبت منك غير الاحترام. أمي عمرها ما غلطت فيكي.”
حماتي بصتلي بنظرة كلها كره وقالت: “ومن النهارده لا إنتِ ولا أمك ليكم رجل في بيتي.”
رد أحمد بسرعة: “يبقى أنا كمان مليش رجل فيه.”
البيت كله سكت.
حتى نجلاء شهقت وقالت: “إيه اللي بتقوله ده يا أحمد؟”
قال وهو ماسك إيدي: “البيت اللي أمي تهين فيه أم مراتي، ويبقى ده شيء عادي… ما ينفعش يبقى بيتي.”
دخل أوضتنا، وبدأ يلم هدومه.
كنت ببصله وأنا مش مصدقة.
قولتله: “إنت بتعمل إيه؟”
قال: “هنمشي. هنأجر شقة، حتى لو أوضة وصالة. المهم نعيش بكرامتنا.”
ولأول مرة من يوم جوازنا، حسيت إن جوزي واقف في ضهري بجد.
بعد يومين، نقلنا لشقة صغيرة بالإيجار.
مكنتش فخمة، لكن كانت مليانة راحة.
أمي أول ما عرفت، رفضت تسيبنا لوحدنا.
كانت كل يوم تبعتلنا أكل، وتسأل علينا، وتدعيلنا.
أما حماتي…
