في شغلانة الدفن دي، انت بتتعلم حاجتين:
الاولانية إن الميتين اهدى خلق الله ومبيعملوش دوشة، والتانية إن البني ادمين الحيين هما اللي فيهم كل البلا والوساخة.
انا عمري ما خوفت من المقابر، ولا اكلت عيش في حتة تانية غير بين الشواهد الرخام والتراب، لحد الليلة اللي غيرت كل مفاهيمي عن الرحمة وعن الجنان اللي ممكن يوصله البني ادم.
الحكاية بدأت في نص شهر طوبة، ليلة تلج الهوا فيها بيقطع في الوش زي السكاكين.
كنت قاعد في اوضتي الصغيرة على باب المقابر، لافف شالي على رقبتي ومشغل الراديو بصوت واطي عشان اسمع اي حركة.
الساعة كانت داخلة على اتنين بعد نص الليل لما لمحت خيال اسود بيعدي من جنب بوابة حوش عيلة الجندي.
الحوش ده بالذات كان محطوط عليه قفل جديد، لأننا لسه دافنين فيه العصر بنت شابة، كانت عروسة وماتت فجأة بحمى غريبة ملحقتش حتى تلبس فستانها.
في الاول قولت ده حرامي بيدور على كشاف نور او حنفية نحاس، مسكت الشومة وولعت الكشاف ونزلت وراه على طراطيف صوابعي.
المشهد اللي شوفته لما وصلت للحوش شل لساني:
الباب الحديد كان مفتوح بهدوء، والست اللي كانت لابسة طرحة سودا سحبت الطوبة اللي قافلة على العتبة، ونزلت درجات السلم لحد العين اللي فيها البنت.
وقفت ورا سور الحوش ابص من الشباك الحديد الصغير، الست كانت مولعة شمعة صغيرة وحطاها على الارض.
وشها مكانش باين، لكن ايديها كانت باينة، ايد ناشفة ومتوسخه رماد.
كانت بتفك رباط الكفن من عند الراس بإصرار بارد، لحد ما وش البنت بان في ضوء الشمعة الباهت، وش اصفر زي الشمع ومتبت في هدوء الموت.
الست دي كانت بتعمل كارثه، الست طلعت من جيبها حاجة ملفوفه بجلده غامقة، مربوطة بخيط صوف اسود ملفوف عقد كتير، ومعاها ابرة خياطة طويلة من بتوع التنجيد. وبكل قسوة، وبحركات ايد ثابتة ترعب، فتحت بق الميتة وحشرت اللفة الجلد دي جوة زورها، وبعدين مسكت الابرة وبدأت تخيط شفايف البنت ببعضها، صوت غرز الابرة في الجلد الميت وهو بيتقطع كان واصل لوداني مع نفس الست الواطي اللي بيردد كلام ملوش اول من اخر، تمتمة تبل الريق بالدم.
انا اتسمرت مكاني من الصدمة، عقلي مكانش مستوعب البشاعة دي.
الست خلصت، شدت الكفن تاني زي ما كان، ونفضت عبايتها وطفت الشمعة وطلعت في ثواني، واختفت بين الممرات كأن الارض بلعتها.
اول ما مشيت، الفضول الاسود ركبني، الشيطان قولت اكيد اللفة دي فيها سحر بيأذي حد من اهل البلد، او يمكن دهب ملفوف، مقدرتش اسيب الميتة كدة، حد هيقولي طب ليه ممسكتهاش وهي بتعمل كدا؟
هقولك:
يا سيدي، اللي إيده في الميه مش زي اللي عينه على إبرة تنجيد بتدخل في لحم ميت الساعة اتنين بالليل في قلب عين مقفولة، ساعتها أجدع شنب بيثبت مكانه، الشجاعة بتتبخر، ومبيفضلش غير سؤال واحد:
الست دي بني ادمه زينا، ولا اللي معاها في الضلمة مش هيسمحوا لحد يقرب منها؟
المهم نزلت السلم وانا ركبي بتخبط في بعض، ريحة الحنة المخلوطة بريحة الموت كانت ضاربه في نفوخي.
شديت الكفن، وبسكينه قصافه كانت في جيبي قطعت الخيط الاسود بالعافية وطلعت اللفة من بقها، وخرجت اجري على اوضتي وقفلت الباب بالترباس ورايا.
قعدت على الكنبة الخشب بتاعتي، ايدي بتترعش وانا بفك الجلدة.
اللي لقيته جوة مكانش دهب، كان حتة قماش مقطوعة من طرحة عروسة، ملفوف جواها خصل شعر ناعمة مقصوصة، ومسمار مصدي معوج، ومكتوب بحبر احمر تقيل زي الدم طلاسم ودوائر واسماء مقلوبة مع دعوة بوقف الحال والجنون والموت البطيء.
هنا انا حسيت بسقعة مش طبيعية نزلت على الاوضة، ازاز الشباك عرق مياه، والراديو فضل يوش ويصفر لحد ما سكت خالص.
وبعدين سمعت الصوت، صوت خطوات رجلين حافية بتمشي برا على الرملة الناشفة، خطوة تجر خطوة ببطء شديد.
الخطوات قربت لحد ما وقفت برة الباب بتاعي بالظبط. حبست نفسي، حسيت قلبي هيقف، وبصيت من الخرم الصغير بتاع القفل اللي في الباب الخشب.
الممر كان منور بنور القمر الخفيف، واللي كانت واقفة برة ماكنتش الست ام عباية سودا، كانت البنت الميتة، كفنها مهدود حوالين كتافها، وعينيها مفتوحة على وسعها ومثبتة على الباب بجمود يرعب.
شفايفها كانت مفكوكة والخيط الاسود مقطوع ومدلدل منها على دقنها، لكن فكها كان متخشب مبيتحركش.
وفجأة، الباب اتهز بهبدة واحدة مكتومة، كان حد بيخبط بجسمه كله، وسمعت صوت طالع من بين سنانها، صوت مخنوق وطالع من اخر زورها زي حشرجة الميه المغلية، كانت بتقول جملة واحدة بتكررها بهستيريا باردة:
رجع اللي في بطني، رجع اللي في بطني عشان اعرف انام.
انا معرفش ازاي متجلطش في اللحظة دي، من خوفي رميت اللفة من الشباك الصغير اللي ورا السرير في الممر المقابل، وصرخت وانا بقرا اي حاجة حافظها من القرآن بصوت عالي ومنهار.
الصوت برة سكت فجأة، وسمعت صوت حفيف الكفن وهو بيتسحب على الرملة ورا الحجاب اللي رميته.
فضلت قاعد مكاني مش قادر اتحرك لحد ما اذان الفجر شق السكون، والنور طلع.
خرجت الصبح زي المجنون، لقيت اللفة اختفت من مكان ما رميتها، ولقيت باب الحوش مقفول بالطوبة بتاعته زي ما كان، مفيش اثر لأي حاجة، غير خط دم ناشف جدا معمول بيه شكل صليب معوج على عتبة اوضتي.
من يومها وانا سبت المقابر دي للابد، وعرفت ان في نوع من البشر مستعد يحبس روح بني ادم في التراب، ويخيط شفايف ميت عشان شره يفضل عايش، وعرفت ان اللي تحت الارض احن بكتير من الشياطين اللي بتمشي على رجلين وسطنا.
تمت
