من عشر دقايق تقريبًا حصلت مشادة كبيرة أوي بين أمي وخالتي وصلت للضرب والسحل وكانت هتكبر أكتر من كدا لولا إن الناس اتدخلوا وبعدوهم عن بعض، وللأسف المشكلة دي كانت بسببي أنا، خالتي مش عاوزاني أروح لأمي مرة تانية مهما حصل وعايزة تاخدني منها بالعافية، في حين إن أمي ومن باب العِند خدتني منها عشان أعيش معاها.
وقبل ما تحكموا على خالتي وتقولوا هي اللي غلطانة حابة أقولكم إن خالتي دي أحسن ست في الدنيا، وهي اللي خلصتني من جبروت أمي اللي وصل لمرحلة غريبة رغم إن أمي خلفتني بعد تلت مرات إجهاض، خلفتني بعد ما أبويا يأس منها ومن إنها تخلف، وعلى عكس المتوقع مكانتش حنينة معايا خالص.
أمي طلعت عليا قهر وقسوة السنين وعملت فيا اللي استحالة أقدر أحكيه للناس، عشان كدا خالتي خلصتني منها وخدتني أعيش معاها، وفعلًا عشت معاها ٤ سنين عرفت فيهم يعني إيه معنى كلمة (أم) بس للأسف أمي رجعت خدتني منها بالعافية وحصل اللي حصل ده. رجعت لأمي اللي استقبلتني بالإهانة وقِلة الأصل والتوبيخ المستمر لأني فضحتها على حسب كلامها، وبدأت تمارس عليا اللي كانت بتعمله زمان، ممنوع أقعد ولو دقيقة، شغل البيت، وشغل برة، ومرتبي كله ليها، وأقوم على خدمتها طول الليل، كانت قادرة تخلي أي شخص يكره الدنيا واللي فيها، وغصب عني كنت بعذرها وبتحمل لأني مبعرفش أقول (لا) لدرجة إن خالتي كانت بتستغرب وبتقولي ازاي أنتي جاية منها، أنتوا الاتنين عكس بعض تمامًا.
برضه كنت بعذرها، أمي أجهضت تلت مرات في حياتها، وكانت على يقين إن حد بيأذيها بالسحر، وأبويا كان بيخوفها وبيكرهها أكتر من أي حاجة في الدنيا، ولما يأس منها وطلقها كانت حامل فيا، ولما ولدت على غير المتوقع قرر إنه يرجعها، بس مسافة ما رجعتله اتوفى، والكل نبذها واتأكدت أكتر إن حد عاملها حاجة، عشان كدا قررت تتعامل مع العالم كله بقسوة وسواد غير طبيعي.
للأسف مقدرتش تميز إن أنا بنتها وطلعت سواد السنين كله عليا، بس أنا كان عندي أمل، لعل وعسى يومًا ما ربنا يرزقني بزوج كويس واتخلص من اللي أنا فيه ده كله، بس حتى الأمنية دي كانت من الصعب أوي إنها تتحقق لأن من ضمن العِقاب اللي أمي فرضته عليا إنها كانت بترفض أي عريس حتى لو كان كويس، كانت بتنتقم مني حتى في جوازي، كانت شايفة إني مسؤولة مسؤولية كاملة لما روحت لخالتي وخليت الناس يتكلموا عليها، وقد إيه هي أم قاسية ولا تستحق الرحمة.
وفضلت ٦ سنين في الجحيم ده، رفضت فيهم ٩ عرسان على الأقل خمسة منهم كويسين، لحد ما الكلام وصل لخالتي، وبدأت تهددها إنها هتعمل فيها محاضر وتجيب رجالة العيلة من البلد يوقفوا في وشها، وفعلًا بدأت تقلب الدنيا عليها بالتهديد والتخويف والوعيد. سنة كاملة في صراع لحد ما أمي فعلًا خافت وقررت إنها تجوزني لأي عريس يجي وتخلص من مشاكل خالتي اللي كانت أكبر منها، وفعلًا جه اتقدملي شخص كويس واتخطبتله وكنت بعجل بالجواز لدرجة إني اتجوزت ونص الشقة فاضي تقريبًا، بس مكنش عندي أي مانع المهم ارتاح شوية من اللي أنا فيه.
ومشيت الحياة كويسة جدًا بعد كدا، زوج حنين، وربنا فتحها عليه وجهزنا شقتنا خلال سنة، مكنش بيحرمني من حاجة وكنت عايشة أحسن ألف مرة من الحياة اللي كنت عايشاها مع أمي، بس زي ما بيقولوا للأسف: دوام الحال من المُحال. أمي رجعت تطاردني تاني وتزورني، دخلت شقتي وانبهرت بالجمال اللي هي فيه، وبقت بتيجي وتبات عندي بالأسبوع وتاكل وتشرب وتاخد راحتها على الآخر، لحد ما قالتلي إنها هتعيش معايا لأنها مريضة ومفيش حد يراعيها، ومقدرتش أرفض ولا كان فيه خيار إني أرفض، كلمت جوزي وقولتله ورحب بيها عشان خاطري رغم كرهه لوجودها.
ومن أول يوم رجعت أيام زمان، ممنوع أقعد، ولو الشقة نضيفة تأمرني أقلبها كلها وأنضفها من أول وجديد، الغسيل يتغسل يوميا، الأكل يتعمل بكميات كبيرة طول اليوم، غير طلباتها اللي كانت مبتخلصش، كان اليوم بينتهي بنام مهدودة، ميتة من التعب، وحقوق زوجي مكنش بياخدها
غير كل فين وفين. تعب وإرهاق وجحيم طويل استمر ٦ شهور كاملين، لحد ما لقتها بتكلمني في مرة وبتقولي إنها هتخرج وراجعة، كنت أنا يومها عند الدكتور، رجعت واستنتها بس مرجعتش، وخلص اليوم ولحد الساعة ١١ بالليل ومرجعتش برضه، كلمتها لقيت التليفون مغلق، كلمت خالتي قالتلي ياريتها توفت ونخلص منها، تلاقيها رجعت بيتها سيبك منها. وفعلًا أمي مرجعتش لمدة يومين تقريبًا، وقررت أزورها بعد يومين كمان لو مرجعتش، ودخلت ليلتها أستحمى وارتاح شوية وكأني طالعة من أيام شغل قاسية جدا جدا، بس اللي لاحظته واستغربته جدا إن حنفية الحمام كانت بتنزل مية لونها أحمر، مديت إيدي في المية وحسيت إنها بتنزل دم مش مية.
استعذت بالله في سري وقفلت المية وخرجت، بس وأنا معدية على المطبخ شميت ريحة أكل مطبوخ، دخلت المطبخ لقيت حلة لحمة مطبوخة وجنبها أكل تاني، نفس طريقة الأكل اللي بتعمله أمي بالظبط، هي رجعت أمتى، وبعدين الأكل لسه معمول حالا. دورت عليها في الشقة ملقتهاش، كنت مستغربة جدا بس ملقتش قدامي غير إني أسكت ومتكلمش، ورجع جوزي من برة ودخلنا عشان ننام، وأثناء وجودنا مع بعض فوجئت بأمي واقفة قدام السرير بتبص علينا، قمت اتنفضت من سريري وجوزي أتخض من حركتي، بصيت يمين وشمال مش شايفة حاجة، خرجت
أدور في كل مكان مش لاقية أي حاجة. وعلى مدار يومين كاملين كنت بصحى بالليل على صوت أمي، كنت بشم ريحة العِطر اللي بتحطه، وكنت بلاقي أكل مطبوخ في المطبخ، الأكل اللي دايما كانت بتعمله، لحد ما سمعت صوت مفاتيحها على باب شقتي، فتحت الباب وخرجت ولمحتها طالعة فوق، ناديت عليها وطلعت وراها جري لقتها بتطلع سِلم السطح، طلعت وراها وأنا مش فاهمة إيه اللي بيحصل.
