اتفاجئت بيها طالعة على السلم الصغير بتاع خزان المية اللي على السطح، وقبل ما ألحقها راحت ناطة في الخزان، طلعت السلم الصغير بسرعة وبصيت عليها، وشوفت جثة أمي كانت طافية جوة الخزان على وش المية ولونها أزرق بطريقة مُرعبة، ومحستش بنفسي غير وأنا بصرخ بأعلى صوتي وبقول: أمي بتغرق.
خرج الجيران على صوتي وطلعوا السطح عشان يتفاجأوا بالجثة زي ما أنا اتفاجئت بيها، اتصلوا بالشرطة وخدوا أقوالي وأنا منهارة، طبعا قلت إنها نطت قدامي، بس كان الكلام غير منطقي لأن الجثة غرقانة من أيام مش انهاردة وده واضح جدا من مظهرها. وفضلت المباحث تحقق مع الكل لحد ما حققوا مع جوزي اللي كان واضح عليه القلق الشديد، وقدروا بطريقتهم يخلوه يعترف، جوزي هو اللي قتلها، خنقها لحد ما كسر رقبتها ولما معرفش يتخلص من الجثة طلع بيها السطح وحطها جوة خزان المية.
جوزي قال في اعترافاته إنها ست شيطانة، كانت بتحقد على بنتها إنها عايشة كويس وبتاكل وتشرب، كانت بتجهدني عشان تحرمه من علاقته معايا وتخليه دايما مخنوق، وبعدها بدأت تغويه إنه يقرب منها هي وفعلًا استجاب ليها غصب عنه، ولما استجاب مرة واتنين بدأت تهدده ميقربش مني خالص وإلا هتفضحه وتطلقني منه.
وحصلت بينهم خلافات كتير فقرر يتخلص منها للأبد، خلاها تكلمني وتقولي إنها خارجة وكان ناوي إنه يقتلها، وفعلًا عمل كدا ورماها في الخزان وفضل أيام بيفكر ازاي يتخلص من الجثة لولا إن أنا اكتشفت الموضوع. جوزي اتحكم عليه بالمؤبد ورجعت لخالتي مرة تانية، خالتي اللي فضلت جنبي أيام عشان أطلع من المِحنة دي، قالتلي إن حياة أمي كانت صعبة جدا، كان ابتلائها من الله إنها تتعب والناس تأذيها، بس كان لازم تصبر عشان ربنا يعوضها.
