الباب كان بيتهز بعنف من خبطات عصام، وصوت رشا بره كان بيشجع وبتقول “اكسر الباب يا عصام، خليها تعرف قيمتها كويس”، أنا كنت قاعدة على سيراميك الحمام، ضامّة ركبي ، ماسكة الموبايل كأنه طوق نجاة، وكل حتة في بتنبض وجع.
فجأة، الموبايل في إيدي رن. كان خالد.
رد خالد بصوت مرعب في هدوئه، صوت عمري ما سمعته منه قبل كدة، صوت راجل مش بس أخويا: “يا ندى.. اسمعيني كويس، ولا حرف يطلع منك، أنا بقالي ساعة في مصر وكنت قدام البيت بكلمك عشان أعملك مفاجأة، سامع كل حاجة من ورا الباب. الباب ده مش هيتكسر، فاهمة؟”.
قبل ما أرد، سمعت صوت خبطة تانية، بس المرة دي الخبطة ما كانتش على باب الحمام، كانت على باب الشقة الأساسي.. خبطة واحدة قوية خلت البيت كله يترج، وصوت تكسير خشب، وصوت صريخ رشا وهي بتقول: “مين ده؟ مين اللي بيكسر الباب؟”.
سكت عصام فجأة، وسمعت صوت خطوات تقيلة وسريعة في الصالة، وصوت خالد وهو بيهدر زي الأسد: “عصام! ابعد عن باب الحمام وارجع لورا.. حالا!”.
أنا كنت سامعة صوت عصام وهو بيحاول يتجمع، بس نبرة صوته اتغيرت من الغضب للخوف،
زق رشا وقاله: “إنت.. إنت جيت إمتى؟ دي مراتي وليا الحق أعمل فيها اللي أنا عايزه!”.
خالد صوته زاد حدة: “حق إيه يا جبان؟ إنت فاكر عشان أبوها مات إنها بقت لوحدها؟ أنا كنت سايبها في أمانة، إنت خنت الأمانة وكسرتها.. وحياتك عندي، لتدفع تمن كل دمعة نزلت منها غالي أوي”.
سكت عصام، ورشا بدأت تعيط وتبرر، بس خالد قطعها: “إنتي اللي بتدوري وراها وتوقعّي بينها وبين جوزها؟ إنتي اللي خليتيه حيوان بالشكل ده؟ حسابك إنتي كمان جاي، بس الأول.. افتحي يا ندى”.
بإيد ميتة، قمت وفتحت قفل الباب، وخرجت لقيت خالد واقف قدام عصام، خالد كان عيونه بتطلع نار، وعصام واقف باهت، ورشا بتستخبى وراه. خالد أول ما شاف حالتي، وشي اللي ورم والدم اللي لسه على شفايفي، ملامحه اتجمدت، وبص لعصام بصة خلت عصام يرجع لورا خطوتين من الرعب.
خالد بصلي وقالي بصوت حنين بس حازم: “ادخلي البسي هدومك وخدّي بنتك.. إنتي مش هتقعدي دقيقة واحدة زيادة في البيت ده”.
عصام حاول ينطق: “يا خالد الموضوع سوء تفاهم.. هي…”، قاطعه خالد بلكمة سريعة وقوية في وشه خلت عصام يقع على الأرض، وهو بيصرخ: “دي مش سوء تفاهم دي جري*مة، والقانون اللي إنت كنت خايف منه، هو اللي هيتولى حسابك دلوقتي”.
…….
عصام وقع على الأرض وهو بيحاول يمسك مناخيره اللي بدأت تنزف، ورشا اتجمدت في مكانها، الصريخ اللي كان مالى البيت تحول لسكون مريب، سكون تقيل بيقطعه بس صوت أنفاسي المكتومة. خالد ما بصش لعصام تاني، كأنه بيحتقر حتى إنه يكمل معاه كلام، التفت ليا وعيونه مليانة غضب ممزوج بوجع على حالي، قالي بصوت واطي بس فيه إصرار: “ندى، ادخلي لمّي هدومك وهدوم البنت.. اللي يمد إيده على أخت خالد ملوش غير إن يتدفن بكرامته أو يتربى بالقانون”.
دخلت الأوضة وأنا إيديا لسه بتترعش، فتحت الدولاب وبدأت أحط أي حاجة قدامي في الشنطة، بنتي كانت واقفة في ركن الأوضة بتعيط بصوت واطي ومذعورة، خدتها في حضني وحاولت أهديها وأنا بمسح دموعي، كنت حاسة إني بحلم.. كابوس سنين بينتهي في دقايق.
خرجت من الأوضة والشنطة في إيدي، لقيت خالد واقف في الصالة، عصام كان لسه قاعد على الأرض ورشا واقفة بعيد، وشها أصفر من الخوف، خالد بصلها وقالها بنبرة حادة: “يا رشا، بيوت الناس مش لعبة، والفتنة اللي كنتِ بتعمليها دي هتتحاسبي عليها، مش بس قدام ربنا، ده أنا هعمل محضر بكل كدمة في جسم أختي، وهجيب تقرير طبي يخليه يلبس قض*ية تنهي مستقبله اللي هو فاكر إنه بيحميه بالضرب”.
عصام حاول يقوم ويبرر، صوت تقطع ومخارج حروفه مش واضحة: “خالد.. اسمعني، دي مراتي، احنا كنا بنحل مشاكلنا..”.
خالد قاطعه وهو بيقرب منه، وقفه بإيد واحدة على كتفه خلت عصام يرجع يقعد تاني غصب عنه: “المشاكل بتتحل بالكلام يا راجل يا ناقص، مش بالضرب وإهانة الست اللي صانتك وصانت بيتك، إنت خسرت كل حاجة.. خسرت مرتك، وبنتك، ورجولتك”.
خالد بص لي وأخد الشنطة من إيدي، مسك إيدي وإيد بنتي، وخرجنا من باب الشقة اللي اتكسر، ونزلنا السلم.. كنت ماشية وأنا مش قادرة أصدق إني أخيراً خرجت من السجن ده، الهواء في الشارع كان مختلف، رغم الوجع، حسيت لأول مرة من سنين إني بدأت أتنفس. خالد ركبنا العربية، وقبل ما يتحرك، بصلي في المراية وقالي: “من اللحظة دي يا ندى، إنتي في حماية أخوكي، ومحدش في الدنيا دي يقدر يلمس شعرة منك تاني.. إحنا رايحين القسم، مش عشان نشتكي وبس، ده عشان ننهي القصة دي بتقرير طبي يخليهم هما اللي يجروا ورانا عشان نتنازل.. بس أنا مش هتنازل”.
#انجي_الخطيب
في القسم، كان الجو مشحون، ريحة الورق والتحقيق كانت بتفكرني بكل لحظة ضعف عشتها، بس وجود خالد جنبي كان مخلي ظهري مفرود لأول مرة من سنين. دخلنا مكتب الظابط، وخالد حط كل الملفات والتقارير الطبية اللي كان مجهزها قبل ما حتى يوصل للبيت، وكأنه كان حاسس بكل اللي بيحصل من قبل ما يرجع من الغربة.
الظابط بص للتقرير الطبي، وبعدين بص لي بأسف وقال: “يا مدام ندى، التقرير ده كفيل يحبسهم، بس هل إنتِ متأكدة؟ لأن بمجرد ما المحضر يتفتح، مفيش رجوع”.
خالد مسك إيدي وشجعني بعينه، وقتها شفت صورة بنتي قدامي وهي بتعيط، شفت طفولتها اللي كانت هتضيع في وسط القرف ده. خدت نفس عميق وقلت بصوت ثابت: “أنا متأكدة يا فندم. كفاية خوف، كفاية ذل، أنا عايزة حقي وحق بنتي اللي عاشت كابوس بسببهم”.
في اللحظة دي، دخل العسكري ومعاه عصام ورشا، شكلهم كان يكسف، عصام وشه وارم من خبطة خالد، ورشا كانت بتترعش، أول ما شافوني، رشا حاولت تصرخ وتدعي عليّ كالعادة، بس خالد قام وقف قدامها وقال بصوت رجولي هز حيطان المكتب: “لسانك ده اللي خرب بيوت الناس، هيتحاسب عليه القانون، هنا مفيش كدب، هنا فيه أدلة”.
عصام حاول يتكلم، حاول يمثل دور الضحية، بس لما الظابط سأله: “ليه عملت كده؟”، بدأ يتهته، وبدأت الحقيقة تظهر، الحقيقة اللي كان بيخبيها ورا “كلام رشا”.
بعد ساعات من التحقيقات، خرجنا من القسم، خالد كان ماسك إيدي وبنتي نايمة على كتفه. الجو بره كان هادي، والشمس بدأت تطلع، نورها كان بيمسح سواد الليل اللي فات. خالد وقف قدام العربية وقال: “ندى، إحنا مش هنروح بيت تاني، إنتي رايحة بيت أمك، ومن النهاردة، حياتك بتبدأ من الصفر، لا فيه عصام يكسر بخاطرك، ولا رشا تفتن عليكي”.
قعدت في حضن أمي، وبنتي جنبي، خالد كان واقف بعيد بيكلم المحامي عشان يضمن لي كل حقوقي الشرعية. ولأول مرة من فترة طويلة، بصيت في المراية.. شفت واحدة تانية، واحدة قوية، واحدة قررت تكسر السلاسل، وتعيش حياة تليق بيها وببنتها.
القصة مخلصتش هنا، القصة بدأت دلوقتي.. بدأت لما ندى قررت تعيش لنفسها، مش عشان ترضي حد، ولا عشان تخاف من حد. ومهما كان الوجع كبير، دايماً فيه باب بيتفتح للنور، بس المهم إننا نكون مستعدين ندخله.
#انجي_الخطيب
……
