سحبها بسرعه لحد ما طلعوا من البيت فعلا و لقت أيلول العربيه.. شالها من التربه ف كان لازق في طرفها كيس قماش إسود فيه مفتاح عربيه.
غريب: “يلا بسرعه.”
ساعدته أيلول يركب ف قال: “إمشي بينا على طول.”
أيلول: “حاضر.”
في نص الطريق.
أيلول: “إحنا رايحين إسكندريه؟ هتروح لباباك؟”
غريب: “لا هنروح ڤيلا ليا هناك.. بابا و أخويا لسه في القاهره.”
أيلول بحزن: “كنت عاوزه أعالج إيدك إلي إتعورت.”
غريب ضحك بسخريه: “تلاقي الدم إتجلط و الجرح إتلم زي أي جرح.”
أيلول بتنهيده: “في جروح مش بتتلم طول العمر يا غريب.. في جروب بتسيب أثر لحد آخر يوم في العمر.”
غريب سند راسه على الشباك و قال: “عارفها و معاشرها الجروح دي.”
إتنهدت أيلول و هي شيفاه بالمنظر ده.. ضعيف و هش تعبان و مكسور مخذول و متخان من أقرب إتنين له بطريقه حقيره!
راح غريب في النوم لحد ما وصلوا القاهره ساعتها أيلول بدأت تهز فيه براحه و بهدوء.
غريب إتنفض و زقها و قال بعصبيه: “مين؟”
أيلول بوجع: “يا عم مين بس إيه.. أنا متمرمطه معاك و أقسم بالله…”
غريب بآسف: “آسف آسف يا دكتوره و الله.. بس يعني…”
أيلول قاطعته: “مفيش مشكله يلا بينا على الڤيلا.. هي فين؟”
غريب وصف لها المكان ف كملت الطريق لحد ما وصلت.. كانت ڤيلا قدام البحر.
أيلول: “فين المفتاح؟”
غريب هرش في شعره.. أيلول بخوف: “لا لا.”
غريب بضحك: “طب مشرط؟”
أيلول ضحكت على ضحكته و هو كان بيضحك بهيستيريه ف وقفت أيلول ضحكت بالتدريج و قالت بقلق: “أنت كويس؟”
غريب: “كويس كويس.. ده شويه ضحك كده.. بس أنت أول مره تشوفيني بضحك من ساعة ما جيتي تعالجيني.”
أيلول قالت بحزن: “عشان مش فاكرها و لا فاكر إنقاذه ليها اه فعلا.”
قرب غريب منها لحد ما لمس إيدها ف ضغط عليها و قال: “طب تعالي على باب المطبخ.. هكسره أنا.”
أيلول بخوف عليه: “مش هينفع.. جسمك مش هيستحمل!”
سحبها غريب و هو متجاهل كلامها لمس الجدران لحد ما لمس أوكره الباب و كسره بمنتهى السهولة برجله.
أيلول بخوف: “أنت كويس؟”
غريب بعصبيه: “ما تبطلي السؤال ده شويه يا دكتوره!”
أيلول إتحرجت جدا و وشها ضرب ألوان و متكلمتش لحد ما خرجوا من المطبخ على الريسبشن بتاع الڤيلا.
في الڤيلا.
أيلول: “أنا معييش لبس و لا أنت معاك لبس و لا أدويتك و لا فونك معاك.”
غريب قعد على الكنبه و قال: “يومين و هنرجع.”
أيلول بصدمه: “نرجع المكان الخطير ده تاني!! لا طبعا.”
غريب بهدوء: “دكتوره أيلول.. لا حابه تسيبيني؟ سبيني أفضل من الدوخه و الحوارات إلي أنت فيها دي.. أنت كان ممكن تموتي النهارده.”
تجاهلت أيلول كلامه و قالت: “أنا مش طايقه هدوم الخروج إلي لبساها دي و عاوزه هدوم تانيه.”
غريب أخد نفس عميق و عرف إنها عنيده و مش هتسيبه و تمشي ف قال: “هتلاقي في الأوضه الكبيره.. بس متلبسيش اللبس الحريمي.. خدي من لبسي.”
أيلول بفضول: “ليه؟”
قام غريب و أخدها من إيدها و دخل بيها الأوضه.. أخد نفس عميق و هو واقف على الباب بعد ما دخلت أيلول جوه الأوضه و قال: “الڤيلا دي الڤيلا إلي قضيت فيها شهر العسل بتاعي.. يعني أفضل فتره جواز على أي شخص.. و حتى الآن مش عارف.. هيدي كانت بتحبني أوي و مستعده تعمل كل شيء عشاني و..”
قاطعته أيلول بغيره: “و هي عملت؟”
غريب ببرود: “اه.. خانتني!”
أيلول: “أنا آسفه إني بفكرك.”
غريب بتنهيده: “و أنا آسف إني بورطك في هم ملكيش فيه.”
قال كده و سابها في الأوضه لواحدها.. لبست أيلول بيچامه ستان محترمه و مقفوله.. و فضلت في الأوضه ساعات بتكلم نفسها! و غريب بره سرحان و لما أيلول مخرجتش قال يسيبها على راحتها.
قدام البحر.
قعد غريب قدام البحر و الموج بيخبط في رجله فجأه لقى حد بيقعد جمبه ف قال: “دكتوره أيلول.. كنت في الأوضه مالك؟”
أيلول بتنهيده: “مقموصه منك شويه.”
غريب بضحك: “و ده ليه؟”
أيلول و هي بترفع أكتافها: “عشان بتقولي يا دكتوره كل شويه.. يعني شيل اللقب.. هيبقى أحلى على فكره.. ده غير إنك أحرجتني على داخلة الڤيلا.”
غريب بتعب: “أنا آسف.. بس أنا تعبان فعلا.”
أيلول بحنان: “و أنا عارفه و خايفة عليك عشان الحروق إلي في جسمك محتاجه دواء و مرهم معين.”
غريب إتنهد إن.. قاطعته أيلول بفرحه: “الله!! فيه مرجيحه في نص البحر! الله بجد!”
غريب بإستغراب: “هي لسه موجوده؟”
أيلول: “أنت إلي حاطتها؟”
غريب سكت شويه و هو بيفتكر شهر العسل بتاعه.
هيدي بضحك: “أنت مجنون! مرجيحه في نص البحر؟”
غريب و هو بيمرجحها و هي ماسكه في چاكيته: “إيه رأيك؟”
هيدي ببرود: “هي فكره مجنونه.. بس محبتهاش أوي.”
غريب بتكشيره: “ليه؟ بقالي فتره بفكر فيها و بعملها بعض بالمايه و كده.. إقدم.. يعني شايفه إن فكرة المرجيحه دي تلزيق؟”
غريب بصدمه: “تلزيق!!”
كانت لسه هتتكلم بس شالها غريب من على المرجيحه و طلع بيها من البحر من غير و لا كلمه.
أيلول: “يا غريييب! سرحت في إيه؟”
غريب فاق من ذكرياته على صوتها و قال: “لا مفيش.”
أيلول بحب و هي بتنام على الرمله: “يا سلام لو حبيبي يجبني على المرجيحه دي و نكون في نص البحر كده.. و يزقني بيها و أفضل أضحك أضحك و هو يضحك.. يضحك.. أحب أكتر و أنا أقع في حبه أكتر.. قد البحر ده!”
بصت أيلول عليه و قالت بحب: “أكتر و أنا أقع في حبه أكتر.. قد البحر ده!”
غريب بحزن على حاله: “رومانسيه أنت.”
أيلول ببساطه: “العلاقات بين الناس لو مفيهاش حب هتبقى مسخه.”
غريب بتنهيده قال جواه هي فعلا مسخه.
قعدوا كتير ساكتين و أيلول بتتخيل نفسها في غريب كل ما تبص له و هما قاعدين على المرجيحه و هي في قمة سعادتها..
أيلول حست إنها بردانه ف قالت بتنهيده: “هدخل أنام أنا.”
غريب بسرحان في ذكرياته: “تصبحي على خير يا أيلول.”
بصت له أيلول و الهواء بيطير شعرها و قالت بحب و خفوت: “و أنت من أهلي يا حياتي أنت!” و دخلت على الأوضه جري.
الفجر.
صحيت أيلول عشان تشرب راحت المطبخ و كان الشباك في المطبخ مفتوح.. بصت بره لقت غريب في البحر!! إفتكرت إنها بتتخيل.. طلعت عشان تتأكد لقيته في البحر فعلا و تقريبا بيغرق!!
أيلول بصدمه و رجلها بتترعش: “غريب!!!” و جريت على البحر.
أيلول: “إيه إلي نزله البحر بليل!!! ده هيغرق!!”
فجأه لقت حد بيرفعها من المايه عرفته من ريحته كان غريب لبسه كان مبلول و الشاش إلي على وشه مسكت فيه و قالت و هي بتفقد الوعي: “غريب!”
غريب حط إيده على وشها عشان يتأكد إنها بخير لقى نفسه بيضرب في إيدها.. ف طلع بيها من البحر و هو بينهج لحد ما دخل الڤيلا بيها.
فتح الدولاب و طلع منه فوطه كبيره بصعوبه عشان مش شايف و قرب من أيلول و لفها بيها هي بتترعش و هو كذلك دلوقتي بس!!
شالها و نيمها على السرير و راح المطبخ جاب فوطه مطبخ و مايه.. و راح على الأوضه مسك الفوطه و حطاها في المايه و بعدين عصرها بقوه و كإنه بيطلع غضبه فيها.. و عملها كمادات لحد ما بقت كويسه و الدنيا بتشتي بغزارة.. ساب الفوطه على جبينها و قام و غير هدومه في الحمام و طلع قعد في الريسبشن.. حسس على الترابيزه لحد ما وصل لعلبة السجاير بتاعته.. أخد واحده و ولعها و شغل التليفزيون.
بعد ما خلصها حس بتعب أكتر و نام لحد ما أيلول صحيت على 7 الصبح.. لما لقت نفسها لسه شعرها مبلوله و لبسها إفكرت إن غريب كان بيغرق في البحر!
شالت الفوطه من على جبينها و جريت تدور عليه في الڤيلا لقيته مرمي على الأرض جمب الكنبه!
أيلول بخضه: “غريب!!”
عند هيدي و أشرف.
هيدي بعصبيه: “جبت جثه مكانه.. إحنا مش متأكدين هل هو مات و لا عايش!”
أشرف بعصبيه: “بقولك عربيته كانت متفحمه أكيد كان فيها…”
هيدي: “و هو راح فين؟”
