كان فيه شاب في بلدنا كل يومين يطلعوه من المقابر بالعافية لأنه كان بيدفن نفسه في أي قبر مفتوح، وياما اتسبب في رعب لناس كتير كانوا بيزوروا الأموات وبيدعولهم، لدرجة إن واحدة ست في مرة كانت هتفقد حياتها لما شافته طالع من قبر مفتوح وشكله عامل زي الأموات.
وهو مكنش بيحب يخرج لأسباب كتير، منهم إن الأطفال كانوا بيزفوه ولا زفة العروسة بالطوب والشتايم والاستهزاء لأنه في نظرهم مجنون ومختل عقليًا.. ولما كان بيطلع على القهاوي عشان يشرب شاي ببلاش كان بيتضرب ويتشتم من أصحاب القهاوي لأنه كان بيشرب فوق الـ ١٠ كوبايات شاي في ساعة زمن، الناس زهقوا منه ومن طلباته، ورغم كدا كان فيه ناس بيشفقوا عليه وبيحاولوا يساعدوه بالأكل والمساعدات والهدوم اللي كان بيقطع أغلبها ويرميها في الشارع.
والغريب إنه أوقات كتير كان بيوقف واحدة ست ماشية في الشارع ويفضل يتكلم معاها على إنها خاينة وعملت فيه حاجات بشعة وإنه كان بيحبها ويفضل يلوم فيها، ستات كتير كانوا بيضحكوا عليه، ومنهم اللي كانت بتخاف ومنهم اللي كانت بتتجاهله، كان مشهور ومعروف والكلام عنه كتير أوي، قليل اللي كان يعرف حكايته..
وقليل أوي اللي كان يعرف الحكاية من أولها، واللي هتستغرب لو عرفت إنهم كانوا بيضربوه لو قرب منهم ومحدش منهم كان بيتعاطف معاه، لدرجة إني احترت مبقتش عارف ده ضحية ولا جاني ولا حكايته إيه، لحد ما كان واحد صاحب أبويا عندنا وبيته جنب بيت (مقصود) العبيط، أو اللي بيقولوا عنه كدا، ولما سألته قرر إنه يحكيلي الحكاية وأنا واثق إنها الحكاية الكاملة والصحيحة.
الغريب إن مقصود ده من ٥ سنين بس كان عريس، واتجوز بنت من أجمل بنات البلد، أخوه الكبير أجبره إنه يتجوزها وهو مكنش بيرفض لأخوه طلب، أو يمكن نقول كان بيخاف من أخوه من يوم ولادته، أخوه كان متسلط عليه وبيجبره يعمل أي حاجة هو عاوزها، حتى إنه أجبره يتجوز من (سماح) غصب عنه..
واتجوز مقصود من سماح وكان عايش حياة مثالية، أخوه رغم قسوته كان بيصرف عليه هو ومراته، وهو كان عايش مع واحدة جميلة بتوريه الهنا كل يوم، عايش مُدلل وكل اللي عليه يسمع كلام أخوه وبس، لحد ما عدى ٦ شهور كاملين على جوازه، وفي مرة رجع من مشوار بدري عكس المتوقع وشاف مشهد مُرعب بالنسباله..
شاف مراته في وضع قذر مع أخوه الكبير، للوهلة الأولى مكنش مصدق اللي هو شايفه، وفضل يكذب عنيه لكن مقدرش، واللي جرحه وكسره تمامًا إن مراته مكنتش مكسوفة ولا خايفة منه، كانت مبتسمة عادي جدًا، ولما بس حاول يعترض أخوه ضربه وسحله قدامها وهدده لو اتكلم هيطرده من البيت خالص، وده لأن أخوه كان متجوز ومراته قاعدة في البيت اللي جنبهم.
مقصود اتكتم تمامًا ومقدرش يتكلم، مكنش له الحق حتى إنه يغضب لشرفه أو ينتقم، وفضل ساكت كتير أوي، أسبوع وهو فاقد النطق لحد ما حاول في مرة يتخلص من مراته، لكن من ضعفه فشل إنه يعمل كدا وهي واجهته ودافعت عن نفسها واتصلت بأخوه اللي جه وضربه على وشه وأهانه وكسر كرامته..
مقصود مقدرش يتمالك نفسه ورمى نفسه من البلكونة وفضل يصرخ في الشارع ويتهم أخوه ومراته بالفُجر وإنه شافهم في أوضاع مخلة وإنها مش أول مرة كمان بل عرف إنهم بيعملوا كدا من ٣ شهور، الناس خدوه على المستشفى وفضل متجبس تلت أسابيع بعد ما رجليه اتكسرت وقدر إنه يقوم من تاني.. وطبعًا الكلام كتر في البلد لحد ما قرر أخوه الكبير يتخلص من مقصود تمامًا، خطفه في ليلة من الليالي ودخله جوة تربة وقفل عليه، وكان متوقع إنه هيفطس جوة ويموت، لكن مقصود قام من رقدته وفضل يصرخ وينادي لحد ما سمعه بعض الناس كانوا في المقابر صدفة وخرجوه من المقبرة بعد ما فضل جوة ٤٨ ساعة كاملين.. مقصود خرج
وقتها من غير عقل، راح على بيته لقى مراته وأخوه قافلين البيت ومشيوا من البلد خالص، وفضل هو يمشي في الشوارع وهو بيعرج بسبب رجليه اللي متعالجتش كويس، ومع الوقت بدأت حالته تتدهور لحد ما بقا بيقعد في الأفراح يشرب شاي كتير أوي، يروح القهاوي يتخانق ويتضرب عشان يشرب شاي، يقضي حاجته قدام الناس في الشارع، وبقا لعبة في إيد
أطفال البلد اللي كانوا بيزفوه كل يوم بالحجارة بعد ما شكله بقا زي المجانين بالظبط، وبقا بيلاقي الهدوء والراحة جوة المقابر، كان بيفرح أوي أول ما يلاقي تربة مفتوحة ومحدش مدفون فيها وكان بيدخل ينام جوة، وده اللي عمل رعب للأهالي، لدرجة إن الناس قبل ما كانوا بيدفنوا كانوا بيفتشوا التربة أحسن يكون مقصود نايم جوة.
