منوعات

مـرات الاب حكـايات إنجـي الخطيـب

وبابا قاعد على الكرسي الهزاز وبيلعب مع ابني الصغير محمود، اللي سميته على اسم أغلى راجل في حياتي، التفت ليا ولقاني سرحانة وباصة للسما ودموعي في عيني. وقف وجه عليا، حط إيده على كتفي وطبطب عليا بحنان وقالي: “سرحانة في إيه يا دكتورة؟ إيه اللي مبكي عيونك الجميلة دي والنهاردة يوم عيد ميلادك؟”

​ابتسمت ومسحت دموعي بسرعة ولفيت حركت راسي في  وقولتله: “أبدًا يا بابا، كنت بفتكر شريط حياتي.. بفتكر اليوم اللي كنت محبوسة فيه وكنت فاكرة إن الدنيا اسودت في وشي وخلاص انتهيت، وشايفة نفسي النهاردة وأنا في حضنك، ومعايا جوزي الحنين وابني، والناس كلها بتشاور عليا بالخير.”

​بابا باس راسي وقالي بصوت كله فخر ويقين: “المؤمن دايماً مصاب يا سارة، وربنا لما بيبتلي حد بيحبه عشان يشوف صبره، وأنتي صبرتي ونجحتي وعافرتي، ومستسلمتيش للوجع. شوفتي بقى إن تدبير ربنا أحسن من تدبيرنا بمليون مرة؟ لو مكنش اللي حصل ده حصل، مكنتش عنايات وأشكالها اتكشفوا، ومكنتيش بقيتي الدكتورة القوية اللي واقفة قدامي دي.”

​في اللحظة دي، دخل جوزي أحمد الأوضة وشايل في إيده تورته كبيرة منورة بالشمع، وابني محمود بيجري قدامه وبيغني بصوته الصغير: “تشا تشا تشا.. سنة حلوة يا ماما!”

​أحمد بصلي بحب وقال: “كل سنة وأنتي منورة حياتي يا سارة، وكل سنة وأنتي أجدع دكتورة وأجمل زوجة وأم في الدنيا.”

​ضحكت من قلبي وجمعتهم كلهم في حضني، وبصيت لصورة ماما اللي متعلقة في الصالة وحسيت إنها شيفاني ومبتسمة ليا. في اللحظة دي اتأكدت إن القصة مكنتش مجرد محنة وعيتني، دي كانت البداية الحقيقية لحياتي، البداية اللي عرفتني إن الحق مبيموتش، وإن اللي يتقي الله ويثق فيه، ربنا بيعوضه بعوض ينسيه مرار السنين كله. وطول ما الراس مرفوعة والأصل طيب، مفيش قوة في الدنيا تقدر .

**********

عدت السنين، ومحمود ابني كبر وبقى في المدرسة، وأنا اسمي كبر أكتر في عالم الطب، وبقيت بلقي محاضرات للطلبة الصغار في نفس المدرج اللي كنت قاعدة فيه زمان وببكي وخايفة من بكرة.

​في يوم وأنا في المستشفى الكبيرة اللي بشتغل فيها، لقيت الممرضة بتخبط على مكتبي وبتقولي: “يا دكتورة سارة، في حالة في الاستقبال برة صعبة جداً، ست مسنة وجاية في غيبوبة سكر ومفيش معاها حد خالص غير فاعل خير جابها من الشارع وسابها ومشي، ومش عارفين نتواصل مع حد من أهلها.”

​قومت بسرعة ونزلت الاستقبال، قلبي الواجب الإنساني فيه مبيخلينيش أتأخر عن أي مريض. أول ما دخلت الأوضة وبصيت على السرير، حسيت إن الزمن وقف بيا لثواني.. الملامح كانت متغيرة، الوش كان دبلان، والشعر كله بقى أبيض، والكسرة والمرض هادين حيلها.. لكن عيني مكنتش بتغلط.. دي كانت عنايات!

​وقفت مكاني، شريط العمر كله مر قدام عيني في لحظة.. افتكرتها وهي بتقفل عليا الباب، وافتكرت صوتها وهي بتقول لابنها “اكسر عينها”.. وافتكرت حبستي ودموعي ورعبي.

​الممرضة بصتلي باستغراب وقالت: “في إيه يا دكتورة؟ حضرتك عارفاها؟”

​أخدت نفس طويل، وبلعت ريقي، وبصيت للسما وقولت في سري: “سبحانك يا رب.. سبحان المعز المذل.. دارت الأيام ووقعت تحت إيدي وبقت حياتها بين إيدين البنت اللي كانت عايزة .”

​بصيت للممرضة وبكل ثبات وهدوء ومهنية قولت لها: “جهزيلي التحاليل فوراً، وعلقي لها المحاليل دي.. الست دي حالتها حرجة ومفيش وقت، هنسعفها الأول وبعدين نشوف أهلها.”

​اشتغلت معاها بكل أمانة وضمير، مكنتش شايفاها عنايات الحرباية، كنت شايفاها مريضة غلبانة ملهاش حول ولا قوة، وربنا حطني في طريقها عشان يختبر قلبي.. والحمد لله قلبي طلع نضيف ومبيعرفش يشيل غل ولا ينتقم.

​بعد كام ساعة، عنايات بدأت تفوق.. فتحت عينيها ببطء وبتعب، وبقت تلتفت حواليها، لحد ما عينيها جت في عيني.. أنا كنت واقفة بالبالطو الأبيض والسمّاعة في رقبتي وبتابع أجهزتها.

​أول ما شافتني، عينيها اتسعت برعب وزهول، وحاولت تتكلم وصوتها طلع مخنوق ومتحشرج: “سـ.. سارة؟!”

​ابتسمت لها ابتسامة هادية وقولت لها: “حمد الله على سلامتك يا طنط عنايات.. أزمتك عدت وبقيتي كويسة.”

​دموعها نزلت فجأة على خدودها، وبقت تحاول ترفع إيدها المرتعشة عشان تمسك إيدي، وصوتها كله كسرة وندم وعياط: “سامحيني يا بنتي.. سامحيني.. ربنا عاقبني وخد مني كل حاجة.. ابني ضاع وشقايا ضاع وأنا بقيت مرمية في الشوارع ومحدش بيسأل فيا.. أنتي ملاك يا سارة، وأنا كنت شيطان.”

​طبطبت على إيدها بالراحة وقولت لها: “المسامح كريم يا طنط، وأنا مسامحاكي من زمان.. المهم صحتك دلوقتي.”

​خرجت من الأوضة وأنا حاسة بروحانية غريبة، حاسة إني طايرة في السما.. ربنا مش بس نجاني ورفعني، ده كمان خلاني أنا الطرف الأقوى والرحيم، خلاني أثبت لنفسي وللدنيا كلها إن الأصل الطيب بيفضل طيب مهما انداس عليه.

​خرجت من المستشفى ولقيت بابا وأحمد ومحمود مستنييني في العربية برة.. ركبت معاهم وبابا بص في وشي وقالي: “مالك يا سارة؟ وشك منور ومرتاح أوي النهاردة.”

​سندت راسي على كتف بابا وقولتله: “النهاردة يا بابا، قفلت آخر  في كتاب الوجع.. والحمد لله، طلعنا إحنا الكسبانين في الآخر.. كسبنا نفسنا وكسبنا رضا ربنا.”

**********

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى